३० चैत्र २०७९, बिहीबार
३० चैत्र ,दिपायल । डोटीमा पहिलोपटक एक सय किलोवाट क्षमताको सोलार मिनिग्रेड जडान गरिएको छ । जिल्लाको दक्षिण भेगमा रहेको बडिकेदार गाउँपालिका–५ लानाकेदारेश्वरमा नेपाल सरकार ऊर्जा, जलस्रोत तथा सिँचाइ मन्त्रालय वैकल्पिक ऊर्जा प्रवर्द्धन केन्द्रको रु सात करोड १२ लाख र बडिकेदार गाउँपालिकाको रु ७९ लाख गरी सात करोड ९१ लाख ९३ हजार छ सय ३५ लागतमा टपसान इनर्जी प्रालि नागार्जुन काठमाडौँ नामक कम्पनीले मार्कोट सौर्य मिनीग्रेड परियोजना निर्माण गरिएको हो ।
विसं २०७९ असारमा सम्झौता गरी २०८० साल वैशाखभित्र सक्ने गरी सम्झौता भएको थियो । सो सम्झौताअनुरुप निर्माण सम्पन्न भएको निर्माण कम्पनीले जानएको छ । मार्कोटमा स्थापना गरिएको एक सय सौर्य मिनीग्रेडबाट त्यस क्षेत्रका करिब दुई सय ९० घरधुरीमा जडान गरिएको टपसान इनर्जी प्रालि नागार्जुन काठमाडौँले जनाएको छ । एक सय किलोवाट सौर्य मिनीग्रेडबाट बडिकेदार गाउँपालिका–५ का मार्कोट, बस्तोला, थानकोट, गडीगाउँ, कुन्थला, धमिगाउँ, सुनडालगायत गाउँमा सोलारबाट बिजुली जडान गरिएको छ ।
वर्षौंदेखि सल्लाको झोरो टुक्की बालेर अन्धकारमा बस्दै आएका स्थानीय सोलार मिनीग्रेडबाट बत्ती बल्ने भएपछि स्थानीयवासी खुसी भएको बडिकेदार–५ मार्कोटका स्थानीयवासी केशव भुलले बताए । सोलार मिनीग्रेड जडान भएपछि विभिन्न व्यवसाय सञ्चालन गर्न सकिने पनि भुलले बताए ।
विद्युत् सेवाबाट वञ्चित रहेको डोटीका स्थानीय तहमध्ये बडिकेदार गाउँपालिका हो । गाउँपालिकामा स्थानीय लघु विद्युत् उत्पादन छैन । साथै उक्त गाउँपालिकालाई राष्ट्रिय प्रसारण विद्युत् लाइनले पनि छोएको छैन । पछिल्लो समय बडिकेदार गाउँपालिका र वैकल्पिक ऊर्जा प्रवर्द्धन केन्द्रको सहयोगमा सोलार मिनीग्रेड जडान भएपछि त्यस क्षेत्रका नागरिक हर्षित भएका छन् ।
गाउँमा विद्युत् जडानले गाउँकै मुहार फेरिएको शिक्षक लोकेश धामीले बताए । नागरिकसँग प्रत्यक्ष जोडिएको शिक्षा, खानेपानी, स्वास्थ्य, यातायातसँगै विद्युत् पनि आवश्यक हो । सोलार मिनीग्रेड जडानले अँध्यारो गाउँबस्तीलाई उज्यालोमा परिणत गरेको छ ।
उज्यालोसँगै व्यापार व्यवसायी गर्न सहज भएको बडिकेदार गाउँपालिकाका अध्यक्ष भैरवबहादुर साउदले बताए । विद्युत्को पहुँच नपुगेको बडिकेदार–५ लानाकेदारेश्वरमा तत्काल यहाँका सर्वसाधारणलाई बत्ती दिने उद्देश्यले यो काम गरिएको अध्यक्ष साउदले बताए ।
प्रकाशित मिति: ३० चैत्र २०७९, बिहीबार
