३१ भाद्र २०८०, आईतवार
३१ ,भाद्र ,काठमाडौँ । आयरल्याण्डको साताव्यापी औपचारिक भ्रमणका लागि सभामुख देवराज घिमिरे डब्लिनतर्फ प्रस्थान गरेका छन् ।
आयरल्याण्डको संसद ओरेचटासको तल्लो सदन डैल आयरेनका सभामुख सीन ओ फियरघेलको निमन्त्रणामा तीन सदस्यीय प्रतिनिधिमण्डलको नेतृत्व गर्दै सभामुख घिमिरे आइतबार साँझ आयरल्याण्ड उडेका हुन् ।
प्रतिनिधिमण्डलमा सभामुख घिमिरे, प्रतिनिधिसभा सचिव पद्मप्रसाद पाण्डेय र सभामुखका प्रमुख स्वकीय सचिव तेजप्रकाश भट्टराई छन् ।
आयरल्याण्डका लागि नेपालीको गैरआवासीय राजदूतावास लण्डनका द्वितीय सचिव रामबाबु नेपाल डब्लिनमा प्रतिनिधिमण्डलसँग सामेल हुनेछन् ।
भ्रमणका क्रममा सभामुख घिमिरेले सभामुख सीन ओ फियरघेल र माथिल्लो सदन सीनाड आयरेनका अध्यक्ष जेरी बटिमरसँग द्विपक्षीय वार्ता गर्ने कार्यक्रम रहेको संसद सचिवालयले जनाएको छ ।
साथै आयरल्याण्ड सरकारका विभिन्न पदाधिकारीहरू तथा आयरल्याण्डमा बसोबास गर्ने नेपाली डायस्पोरासँग पनि भेटघाट गर्नेछन् । औपचारिक भ्रमण सम्पन्न गरी सभामुख घिमिरे ७ असोजमा स्वदेश फर्किनेछन् ।
प्रकाशित मिति: ३१ भाद्र २०८०, आईतवार
