२ फाल्गुन २०८२, शनिबार
काठमाडौं । आइतबार पर्ने महाशिवरात्रि पर्वका लागि पशुपतिनाथ मन्दिर क्षेत्रमा सम्पूर्ण तयारी पूरा भएको छ। रङरोगन, सरसफाइसँगै साधु–सन्तहरूको आगमन बढेको छ भने सुरक्षासहित भीड व्यवस्थापनको योजना कार्यान्वयनमा ल्याइएको छ।
काठमाडौँ उपत्यका ट्राफिक प्रहरी कार्यालयले दर्शनार्थीको सहज आवतजावतका लागि विशेष ट्राफिक योजना बनाएको छ। चाबहिल, गौशाला र तिलगंगामा सामान्य अवस्थामा सवारी निर्वाध चल्नेछ भने अत्यधिक भीड भएमा गौशाला क्षेत्रमा सवारी निषेध गरी वैकल्पिक मार्ग प्रयोग गरिनेछ।
तिनकुने–सिनामंगल, बौद्ध–गौरीघाट, पुरानो बानेश्वर, गौशाला र मित्रपार्कतर्फ आउने मालबाहक सवारी साधनलाई आवश्यकता अनुसार रोक लगाइनेछ। दर्शनार्थीका लागि सिफल चौर, गुहेश्वरी पारी, तिलगंगा आँखा अस्पताल क्षेत्र, भण्डारखाललगायत स्थानमा पार्किङ तोकिएको छ।
ट्राफिक प्रहरीले भक्तजनलाई सार्वजनिक सवारी र तोकिएको पार्किङ प्रयोग गर्न आग्रह गरेको छ।
प्रकाशित मिति: २ फाल्गुन २०८२, शनिबार
