२ फाल्गुन २०८२, शनिबार
काठमाडौँ । केपी शर्मा ओली नेतृत्वको नेकपा एमालेले आगामी निर्वाचनलाई लक्षित गर्दै विकास, सुशासन र समृद्धिको स्पष्ट खाका सार्वजनिक गरेको छ।
‘केपी शर्मा ओलीलाई नै भोट किन ?’ शीर्षकसहित सार्वजनिक गरिएको प्रतिबद्धतामा राष्ट्रिय स्वाधीनताको रक्षा, लोकतन्त्रको सुदृढीकरण र जनताको मौलिक अधिकार पुनःस्थापनालाई प्राथमिकतामा राखिएको छ।
एमालेले विदेशी हस्तक्षेप अन्त्य गर्दै देशमा शान्ति, स्थायित्व र समृद्धिको वातावरण बनाउने प्रतिवद्धता जनाएको छ। साथै रोजगारी सिर्जना, युवालाई सीपमूलक तथा प्राविधिक शिक्षासँग जोड्ने, आत्मनिर्भर अर्थतन्त्र निर्माण गर्ने लक्ष्य अघि सारिएको छ।
घोषणापत्रमा कृषि, उद्योग, पर्यटन, पूर्वाधार र स्वास्थ्य क्षेत्रमा ठूला सुधारको योजना उल्लेख छ। पूर्व–पश्चिम राजमार्ग, द्रुतमार्ग, सडक सञ्जाल विस्तारदेखि अस्पताल, विद्यालय र सामुदायिक संरचनाको स्तरोन्नतिसम्मका कार्यक्रम समेटिएका छन्।
एमालेले भ्रष्टाचारविरुद्ध कडा कदम चाल्ने, सुशासन कायम गर्ने र जनतालाई सहज स्वास्थ्य तथा गुणस्तरीय शिक्षा उपलब्ध गराउने दाबी गरेको छ। साथै स्थानीय उत्पादन, वन तथा फलफूल विकास, औद्योगिक क्षेत्र विस्तारमार्फत रोजगारी र आम्दानी बढाउने नीति अघि सारिएको छ।
‘स्थिर सरकार, बलियो नेतृत्व र स्पष्ट दृष्टिकोणका लागि केपी शर्मा ओली आवश्यक छन्’ भन्ने सन्देशसहित एमालेले सूर्य चिन्हमा मतदान गर्न मतदातालाई आह्वान गरेको छ।
प्रकाशित मिति: २ फाल्गुन २०८२, शनिबार
