२ फाल्गुन २०८२, शनिबार
काठमाडौँ। राष्ट्रिय प्रजातन्त्र पार्टी (राप्रपा)ले आगामी प्रतिनिधिसभा निर्वाचनका लागि आफ्नो सङ्कल्प पत्र सार्वजनिक गरेको छ। पार्टी अध्यक्ष राजेन्द्र लिङ्देनले धुम्रबाराहीस्थित केन्द्रीय कार्यालयमा आज कार्यक्रममार्फत पत्र सार्वजनिक गर्नुभएको हो।
सङ्कल्प पत्रले राजनीतिक स्थिरता, सुशासन, आर्थिक सुधार, सामाजिक न्याय र समृद्धिको लक्ष्य तय गरेको छ। प्रमुख योजनामा शिक्षा–स्वास्थ्यमा निःशुल्क पहुँच, रोजगार सिर्जना, पुँजी निर्माण, दिगो विकास र प्रविधि विस्तार समावेश छन्।
पार्टीले देशलाई २०८७ सम्म मध्यम आयस्तरको राष्ट्र बनाउने योजना अघि सारेको छ। जलस्रोत, पर्यटन, कृषि, सूचना प्रविधि, विदेशी नेपालीको सीप तथा निजी क्षेत्रको सहभागितामा जिडिपीमा ८२% योगदान पुर्याउने लक्ष्य राखिएको छ।
साथै, वैदिक सनातन धर्मसापेक्ष हिन्दू राष्ट्र, राष्ट्रिय एकता–सुरक्षा, सांस्कृतिक संरक्षण र दुई तहको शासन संरचनासहित सर्वधर्म समभाव सुनिश्चित गर्ने प्रतिबद्धता पनि पत्रमा उल्लेख छ।
प्रकाशित मिति: २ फाल्गुन २०८२, शनिबार
