४ असार २०८२, बुधबार
काठमाडौँ। सञ्चार तथा सूचना प्रविधिमन्त्री पृथ्वी सुब्बा गुरुङले नेपालमा सञ्चार क्षेत्र समावेशिताको उत्कृष्ट उदाहरण बन्दै गएको बताएका छन् ।
बुधवार मन्त्रालयमा आयोजित मन्त्रिपरिषद्का निर्णयहरू सार्वजनिक कार्यक्रममा बोल्दै उनले यस्तो बताएका हुन् । उनले सार्वजनिक सेवा प्रसारण ऐन कार्यान्वयनमा नेपालले उल्लेखनीय प्रगति गरेको बताए । उनले नेपाल दक्षिण एसियामा सार्वजनिक सेवा प्रशारण ऐन कार्यान्वयन गर्ने अग्रणी देशमध्ये रहेको दाबी गरे । उनले सार्वजनिक सेवा प्रशारण ऐन बन्ने क्रममा रहँदा नै गोरखापत्र दैनिकमा ४५ भाषामा अतिरिक्त समाचार सामग्री प्रकाशित भइरहेको बताए । उनले रेडियो नेपालबाट २५ वटा नेपाली भाषामा समाचार प्रशारण भइरहेको र राष्ट्रिय समाचार समितिले मैथिली र नेपाल भाषामा समाचार समेटिसकेको जानकारी दिए । उनले चाँडै तामाङ भाषामा पनि समाचार शुरु गर्ने बताउँदै नेपालमा बोलिने सबै भाषाको रासस बनाउने लक्ष्य रहेको जिकिर गरे । मन्त्री गुरुङले नेपाल टेलिभिजन र रेडियो नेपाललाई पनि सबै भाषामा कार्यक्रम प्रसारण गर्ने दिशामा लैजाने योजना रहेको बताए ।
उनले भने, “नेपाल सरकारले सार्वजनिक सेवा प्रशारण ऐन बनाइसकेको छ । त्यसको पहिलो उद्देश्य नै पिपुल फस्ट, नेशन फस्ट हो । त्यसमा आधारित भएर हामीले कार्यक्रमहरू बनाउने, न्युजहरूको प्रशारण गर्ने कुरा हुन्छ । साउथ एसियामा नेपाल पहिलो देश होला, पीएसबीको पहिलो देश त म भन्दिन, हामी अगाडी नै छौँ । इण्डियापछि हामी नै होला । पीएसबी लागु हुने क्रममा नै गोरखापत्रमा ४५ भाषामा अतिरिक्त समाचार प्रकाशित हुन्छ । त्यो संसारको कुनै पनि देशमा छैन होला जस्तो लाग्छ मलाई । रेडियो नेपालमा २५ वटा नेपाली भाषामा समाचार प्रसारण हुन्छ । राससमा मैथिली र नेपाल भाषामा पनि जोडेका छौँ । हामी अब चाँडै तामाङ भाषामा पनि गर्छौ । कुनै दिन त हामी नेपालमा बोलिने सबै भाषाको रासस बनाउने हो । रेडियो नेपाल र नेपाल टेलिभिजनलाई नेपालमा बोलिने सबै भाषाको समाचार तथा कार्यक्रम प्रसारण हुने बनाउने अभियानमा छौँ हामी । सायद, सङ्घीय लोकतान्त्रिक गणतन्त्र आइसकेपछि कुनै क्षेत्र समावेशी छ भने सञ्चार र सूचना प्रविधि क्षेत्र मात्रै हो ।”
उनले सञ्चार तथा सूचना प्रविधि मन्त्रालय समावेशिताको मूल इपिसेन्टर रहेको समेत बताए ।
प्रकाशित मिति: ४ असार २०८२, बुधबार
