३१ जेष्ठ २०८२, शनिबार
काठमाडौँ। नेपाली काँग्रेसका सांसद चन्द्र भण्डारीले नेपालको शिक्षा क्षेत्रमा देखिएका समस्याहरुमा विगतको नेतृत्व दोषी रहेको बताएका छन ।
शनिवार शिक्षा, स्वास्थ्य तथा सूचना प्रविधि समितिको बैठकमा बोल्दै सांसद भण्डारीले समयमै ऐन कानून निर्माण हुन नसक्दा अहिलेका समस्या आइरहेको बताएका हुन् । उनले पूर्खाहरुले मुलुकभर २८ हजार विद्यालय सञ्चालनमा ल्याएको भएपनि करिव १७ हजार विद्यालय बन्द हुने अवस्थामा पुगेको स्पष्ट पारे । सरकारी विद्यालयलाई विश्वास गर्ने वातावरण बन्न नसक्नु सबैभन्दा ठूलो चुनौतिका रुपमा रहेको उनको भनाइ छ । शिक्षा प्रणाली राम्रो नहुँदा मुलुकलाई अगाडि बढाउनसमेत समस्या हुने बताउँदै सांसद भण्डारीले ऐन कानून निर्माणमा गम्भीर बन्न नसक्दा वर्तमानको परिस्थिति सिर्जना भएको उनको भनाइ थियो । उनले शिक्षकका सेवा सुविधाका कुरासँगै आफुहरुको कर्तव्यका विषयमा गम्भीर बन्नुपर्ने अवस्था आएको स्पष्ट पारे ।
उनले भने, ‘आज हामी जे छलफल गरिरहेका छौं । नेपालमा शिक्षा क्षेत्रमा जे समस्याहरु देखिरहेका छन् । विगत पनि दोषी छ विगतको नेतृत्व पनि दोषी छ । जसले समयमा ऐन ल्याउन सकेन, छलफल गर्न सकेन । हाम्रो पूर्खाले हाम्रो देशमा २८ हजार विद्यालय सञ्चालन गरेपनि २८ हजारमा १७ विद्यालयहरु बन्द हुँदैछ । हामी कहाँनेर चुक्यौं त्यो महत्वपूर्ण प्रश्न हो । के कारण हाम्रा बच्चाहरु सरकारी स्कूलमा जाँदैनन् । के कारण सरकारी विद्यालयमा विश्वास गर्दैनन् त्यो सबैभन्दा ठूलो चुनौति हो । यसमा हामी सबैभन्दा पहिले गम्भिर हुनुपर्छ । र, नेपाल सरकारले प्रस्तुत गरेको शिक्षा विधेयकले राम्रो प्रतिनिधित्व गर्नसकेन भनेर शिक्षकहरु आन्दोलनमा आए । हामीले उपसमिति गठन गरेर करेक्सन गर्यौ । मन्त्रालयले सम्झौता गरेर भर्खर पेश गरेको छ । मुलुकको शिक्षा राम्रो भएन भने हामीले मुलुकलाई अगाडि बढाउन सक्दैनौं । आज युवाहरुले भनेजस्तै सूर्यले आपू जलेर प्रकाश दिन्छ हामी पनि जलौं भनेको हैन । हामी अलि गम्भीर बन्नुपर्छ । हामी गम्भीर बन्न नसक्दा यो परिस्थिति आयो । तर, हामीले अहिले अधिकारका कुरा गरौं । शिक्षकले सेवा सुविधाका कुरा गरे तर हाम्रो कर्तव्य के हो हामीले कस्ता विद्यार्थी उत्पादन गर्ने ? म यो शिक्षा क्षेत्रमा बामपन्थी धार, चीनका कुरा ती पाँच वर्ष मुनीको बच्चा कस्तो हुनुपर्छ भन्ने कुरामा कर्तव्यको कुरै गरेनौं । नैतिक शिक्षाको बारेमा, सुरक्षाको बारेमा, अतिथिको बारेमा र स्वयं पाँच वर्ष मूनीका बच्चाले के गर्छ भन्ने विषयमा कहिल्यै छलफल नै गरेनौं । हामीले लगानी त गरौं तर कस्तो शिप दिने त्यसमा हाम्रो गल्ती हो कि ? शिक्षकको गल्ती हो कि ? त्यसतर्फ सोच्नुपर्छ । हामीले यसबारेमा अलि गम्भीर हुनुपर्ने समय आएको छ । त्यसकारण हामी अधिकारका कुरासँगै कर्तव्यको पनि कुरा गरौं । हामीले शिक्षकसँग कुरा गर्दा कर्तव्यको पनि कुरा गरौं । १५ हजार विद्यालय त्यसै बन्द हुँदैछ अब टिचर नै पाइँदैन भने कसरी सुधार गर्ने ? हामी कहाँनेर चुकिरहेका छौं भन्ने विषयमा निकास दिनुपर्छ । कस्तो अभिभावक, कस्तो समाज बनाउने भन्ने विषयमा हामी आफैंले बनाउने हो । हाम्रो मुलुकलाई कस्तो शिक्षा बनाउने र कुन शास्त्रहरु प्रयोग गर्ने भन्ने विषयमा गम्भीर बन्नुपर्छ । यसमा हामी गम्भीर बनेका छौंजस्तो लाग्दैन । अब हामी राजनीतिक गर्ने शिक्षकलाई हटाउने कि उनीहरुको सेवा सुविधा बढाउने ? हाम्रा धेरै कुरामा कमी,कमजोरी छन् यो सबै जिम्मा राज्यले लिनुपर्छ । अब हामीले यथार्थ धरातलमा पुगेर शिक्षा विधेयक बनाउने विषयतर्फ ध्यान दिनुपर्नेछ ।’
उनले आफ्ना कमीकमजोरी सच्याउँदै यथार्थ धरातलमा पुगेर शिक्षा विधेयक बनाउने विषयतर्फ ध्यानदिनुपर्ने बताएका छन् ।
प्रकाशित मिति: ३१ जेष्ठ २०८२, शनिबार
