१ श्रावण २०८२, बिहीबार
काठमाडौँ। नेकपा (माओवादी केन्द्र) का सांसद विष्णुबहादुर विश्वकर्माले जलश्रोतको मुहानको प्रयोग सबैले गर्न पाउनुपर्ने बताएका छन् ।
बिहीवार सिंहदरबारमा बसेको विधायन व्यवस्थापन समितिको बैठकमा जलश्रोत विधेयक, २०८१ माथिको छलफलका क्रममा उनले यस्तो बताएका हुन् । मुहानको प्रयोग जग्गाधनीले मात्रै गर्दा अहिले पनि दलित समुदायले विभिन्न खाले समस्या भोगिरहेको उल्लेख गरे । उनले निजी जग्गा भित्रको जलश्रोतको मुहान प्रयोग गर्नेकुरा सम्बन्धित जग्गाधनीको अधिकारको कुरा भएको भन्दै यसले दलित समुदायमा पीडावोध गराएको बताए । दलित समुदायसँग जग्गा नहुने र जग्गा नहुने दलित समुदायले मुहानको प्रयोग गर्न नसक्ने स्थितिको अन्त्य जरुरी रहेको बताए ।
उनले भने, ‘अर्कोतिर यो जलश्रोतको मुहानको विषयमा कुरा छ । निजी आफ्नो जग्गा भित्रको जलश्रोतको मुहान प्रयोग गर्ने व्यक्तिहरुमा भन्ने छ । यसले दलित समुदायमा ठूलो पीडाको अनुभुति गराएको छ । किनभने दलित समुदाय जग्गा पीडित छ । उसँग जग्गा पनि छैन । जग्गा नभएपछि उसको पानीको श्रोत हुनेकुरा पनि भएन । अरुले श्रोत प्रयोग गर्न नदिँदा अहिले पनि भोगिरहेका छन् ।’
सांसद विश्वकर्माले नदी सम्झौता गर्दाका धेरै पीडाहरु नेपालले भोगिरहेको बताए । गण्डकको पानी उपभोग गर्न नपाउँदै धेरै पीडा नेपालीहरुले भोगिरहेको उल्लेख गरे ।
प्रकाशित मिति: १ श्रावण २०८२, बिहीबार
