३० जेष्ठ २०८२, शुक्रबार
काठमाडौँ। राष्ट्रिय सभामा नेकपा (माओवादी केन्द्र)का सांसद जगप्रसाद शर्माले विगतमा प्रतिपक्षी भुमिकामा रहेकाहरुको प्रभावमा परेर अहिलेको प्रतिपक्षले संसद अवरोध गरेको बताएका छन् ।
शुक्रवार राष्ट्रिय सभा बैठकको विशेष समयमा बोल्दै सांसद शर्माले विगतमा प्रतिनिधि सभामा नेकपा एमालेले नौ महिनामा ५८ वटा र नेपाली काँग्रेसले २ महिनामा २२ वटा बैठक अबरोध गरेको स्मरण गराएका हुन् । प्रतिपक्षले जुन माग राखेर संसद अवरोध गरिरहेको छ त्यो मागबाट पछि हटेर भिजिट भिसा प्रकरणमा कम्तिमा संसदीय प्रक्रियाअनुरुप छानविन समिति बनाएर समस्या समाधानका लागि लचकता प्रश्तुत गरेको उनले दाबी गरे । उनले नेपालको नयाँ व्यवस्थाले माग गरेको अर्थ व्यवस्था प्रश्रव पीडाबाट गुज्रिरहेको र आआफ्नो बुझाइ, सोचाइ, दृष्टिकोण, आस्था र विश्वासका आधारमा अपेक्षाहरुबारे तर्क गरिरहेपनि हामीले परिकल्पना गरेको, संविधान र व्यवस्थाले परिकल्पना गरेको नयाँ अर्थव्यवस्था धनको नभई श्रम विज्ञानको रहेको उनको भनाई थियो ।
उनले भने, ‘नेकपा एमालेले नौ महिना संसद अबरोध गरेको इतिहास रहेछ (५८ वटा बैठक) । नेपाली काँग्रेसले २ महिनामा २२ वटा बैठक अबरोध गरेको रहेछ । सायद यसैको प्रभाव परेर हो कि अहिलेको प्रतिपक्षले जुन माग राखेर संसद अबरोध गरेको थियो । त्यो मागबाट पनि पछि हटेर कम्तिमा संसदीय प्रक्रिया अनुरुप छानविन समिति बनाएर अगाडि जाऔं, समस्याको समाधान गरौं भनेर लचकता प्रस्तुत गरेको छ । आज मैले नेपालको नयाँ व्यवस्थापछि यसले माग गरेको नयाँ अर्थ व्यवस्था निर्माणमा महिलाहरुको योगदानको विषयमा कुरा राख्दैछु । कुनैपनि नयाँ चिजको जन्म र विकास एउटा लामो श्रम र संघर्षको प्रक्रियाबाट हुन्छ । किनकी श्रम र संघर्ष नै सबैचिजको जननी हो । हामीले नयाँ व्यवस्था जे पाइरहेका छौं यो लामो कठोर संघर्षपछि एउटा प्रश्रव पीडाबाट प्राप्त भएको हो । यो राजनीतिक व्यवस्थाले माग गरेको अर्थ व्यवस्थापनि एउटा प्रश्रव पीडाबाट गुज्रिरहेको छ । हामीले आआफ्नो बुझाइ, दृष्टिकोण, सोचाइ, आस्था र विश्वासका आधारमा यो अर्थव्यवस्थाका विभिन्न अपेक्षाहरु गरिरहेका छौं, तर्कहरु प्रश्तुत गरिरहेका छौं । सम्पूर्ण कुराहरु निजीकरण गर्दा नयाँ अर्थव्यवस्था निर्माण हुन्छ कि भन्ने तर्कपनि होलान्, सम्पूर्ण कुरा राष्ट्रियकरण गरिसकेपछि नयाँ अर्थ व्यवस्था प्राप्त हुन्छ कि भन्ने धारणा पनि होलान् । आजको विकसित परिस्थितिमा संसारमा कुनै न कुनै ढंगले सम्पूर्ण कुरा राष्ट्रियकरण गर्दा वा निजीकरण गर्दा त्यसले पैदा गरेको भयावह स्थिति र असफलताबाट पाठ सिकेर हामीले आधारभूत कुरा राष्ट्रियकरण, केही कुरा निजीकरण र केही कुरा समुदायकरण गरेरमात्र नयाँ अर्थव्यवस्था निर्माण गर्नसक्छौं र अहिलेको व्यवस्थालाई अगाडि बढाउनसक्छौं भन्नेकुरा नयाँ ढंगले बहस गरिनुपर्छ । त्यसकारण हामीले परिकल्पना गरेको, अहिलेको संविधान र व्यवस्थाले परिकल्पना गरेको नयाँ अर्थव्यवस्था भनेको धनको विज्ञान होइन, श्रमको विज्ञान हो, किनकी धन श्रमको उपज हुन्छ । त्यसैले अहिलेसम्मको मान्यता जे हो कुनैपनि वस्तुको मूल्य निर्धारण लागत सिद्धान्तका आधारमा या उपयोगिताका आधारमा वा माग र पूर्तिका आधारमा होइन त्यसमा लाग्ने श्रमका आधारमा हुनुपर्छ भन्ने नयाँ मान्यतालाई हामीले स्थापित गर्नसक्यौं भने मात्र हामीले नयाँ अर्थव्यवस्था निर्माण गर्नसक्छौं ।’
उनले कुनैपनि वस्तुको मूल्य निर्धारण लागत सिद्धान्त, उपयोगिता र माग वा पूर्तिका आधारमा नभई त्यसमा लाग्ने श्रमका आधारमा गरिए नयाँ मान्यता स्थापित गरेर नयाँ अर्थव्यवस्था निर्माण गर्न सकिने स्पष्ट पारे ।
प्रकाशित मिति: ३० जेष्ठ २०८२, शुक्रबार
