प्रधानमन्त्रीले सभामुखलाई भने -‘सदन खुलाउन भूमिका खेल्छु,तपाईं पनि लाग्नुहोस् ,छिट्टै सहमति गर्नैपर्छ’

१ भदाै, काठमाडाैँ । प्रधानमन्त्री पुष्पकमल दाहल प्रचण्ड र सभामुख देवराज घिमिरेबीच छलफल सकिएको छ । बालुवाटारमा भएको छलफलमा सदन खुलाउनेबारे छलफल भएको थियो । भेटमा सभामुखले सदन नचल्नु राम्रो नभएको र शीर्ष तहमा सहमतिको आवश्यकता रहेको बताएका थिए । भेटमा प्रधानमन्त्रीले सदन खुलाउन भूमिका खेल्ने र सभामुखलाई पनि पहल गर्न भनेका थिए । प्रधानमन्त्रीले भन्नुभयो,’म पनि सदन खुलाउन भूमिका खेल्छु । तपाईं पनि लाग्नुहोस् । छिट्टै सहमति गर्नैपर्छ । म प्रमुख विपक्षी दलको नेतासँग थप पहल गर्छु ।’

‘माननीयहरुले बोल्न समय माग्नुभएको छ । प्राकृतिक विपत्ति लगायतका धेरै विषयमा माननीयहरुले बोल्न पाइनँ भन्नुहुन्छ । दलिय सहमतिबिना सदन अगाडि बढ्न सक्ने स्थिति छैन । आम जनताले पनि सदन अवरोधलाई राम्रो मानेका छैनन् । कम्तिमा सदन खुलाउन सत्तापक्ष र प्रतिपक्षले गम्भीरतापूर्वक छलफल गरिदिनुहोस् । समितिको नेतृत्व चयन हुन सकेको छैन । संसदमा कानून निर्माण भएनन् भन्ने गुनासो छ । सभामुखको रुपमा मैले सहमतिका लागि जिम्मेवारीपूर्वक पहल गरेको छु । तर, परिणाममा निस्किन सकेन । शीर्ष नेताहरु नै घण्टौं बस्दा पनि सहमति भएन,’ सभामुखले भनेका थिए ।