२९ श्रावण २०८०, सोमबार
२९ श्रावण, काठमाडाैँ । नेपाल प्रेस युनियन केन्द्रीय कार्य समितिले गोरखापत्र संस्थानमा कार्यरत करार सेवाका १२ जना पत्रकारलाई हटाउने निर्देशनप्रति आपत्ति जनाएको छ ।
सञ्चार तथा सूचना प्रविधि मन्त्रालयले गत हप्ता गैरकानुनी रूपमा नियक्त गरिएको भन्दै ती पत्रकारलाई हटाउन निर्देशन दिएको थियो । तर, युनियनले संस्थानमा १५० जना भन्दा बढी पत्रकार तथा कर्मचारी करार सेवामा कार्यरत रहेपनि १२ जनालाई मात्र हटाउने भन्नु राजनैतिक प्रतिशोध भएको समेत टिप्पणी गरेको छ ।
‘श्रमजीवि पत्रकार ऐन कार्यान्वयन गर्ने जिम्मेवारीमा रहेको सञ्चार तथा सूचना प्रविधि मन्त्रालयले समस्या समाधानको लागि पहल गर्नुपर्नेमा नियामक निकायलाई देखाएर जिम्मेवारीबाट पन्छन खोज्नुको नियत शंकास्पद छ ।’ युनियनले विज्ञप्तीमार्फत भनेको छ ।
२०७८ कार्तिक ३० गते नियुक्त भएका अनलाइन, बजार व्यवस्थापन तथा पत्रिकाका कर्मचारीहरूको नियुक्ति अवैधानिक भएको मन्त्रालयले ठहर गरेको छ ।
तर, युनियनले भने उनीहरूलाई हटाए कडा कदम चाल्न बाध्य हुने चेतावनी दिएको छ ।
यो पनि पढ्नुहोस् ।
गोरखापत्रमा कार्यरत १२ पत्रकारको नियुक्ति खारेज गर्न निर्देशन
प्रकाशित मिति: २९ श्रावण २०८०, सोमबार
