१० असार २०८०, आईतवार
१० असार, काठमाडाैँ । अख्तियार दुरुपयोग अनुसन्धान आयोगको टोलीले पशुपतिनाथ मन्दिर परिसरमा राखिएको जलहरीको अनुगमन गर्ने भएको छ ।
अख्तियारको टोली जाने भएपछि पशुपतिनाथ मन्दिर परिसरबाट सबै भक्तजनलाई निकालेर सबै ढोकामा ताला लगाइएको छ।
पशुपतिनाथ मन्दिरमा जलहरी राख्ने क्रममा भ्रष्टाचार भएको उजुरीमा छानबिन गर्न अख्तियारका अधिकारीहरु जाने भएका हुन् । उक्त टोलीले जलहरीको ताैल समेत लिने बताइएको छ ।
तत्कालिन प्रधानमन्त्री केपी शर्मा ओली नेतृत्वको सरकारको पालामा पशुपतिनाथ मन्दिरमा राखिएको सुनको जलहरीमा घोटला भएको भन्दै अहिले विभिन्न सवाल उठिरहेका छन् ।
सरकारले नेपाल राष्ट्र बैंकबाट १०३ किलो ७७३ ग्राम सुन ८० करोड १ सय ११ हजारमा किनेको थियो । तर, महालेखा परीक्षकको रिपोर्टले जलहरीमा सबै सुन प्रयोग नभएको उल्लेख गरेको थियो ।
प्रकाशित मिति: १० असार २०८०, आईतवार
