९ असार २०८०, शनिबार
९ असार, काठमाडाैँ । खराव ब्याटिङ गरेपछि नेपालले जिम्बावेमा जारी आइसिसी एकदिवसीय विश्वकप छनोट खेलको समूह चरणको अन्तिम खेलमा जितका लागि नेदरल्यान्ड्सलाई एक सय ६८ रनको मध्यम लक्ष्य दिएको छ ।
हरारे स्पोर्ट्स क्लबको मैदानमा टस हारेरपहिले ब्याटिङको निम्तो पाएको नेपालले ४४.३ ओभरमा सबै विकेटको क्षतिमा एक सय ६७ रन बनायो । टस जितेर फिल्डिङ रोजेको नेदरल्यान्ड्सले कसिलो बलिङ गरेको हो ।
नेपालका लागि कप्तान रोहित पौडेलले ३३ रन बनाए । ओपनर कुशल भुर्तेल र सन्दीप लामिछानेले समान २७/२७, भिम सार्कीले २२, गुलसन झाले १५, दीपेन्द्रसिंह ऐरीले १४ र कुशल मल्लले १२ रन बनाए। आरिफ शेख ६, करण केसी एक र आशिफ शेख शुन्य रनमा आउट भए ।
बलिङमा नेदरल्यान्ड्सका लोगन भान वीकले तीन, विकेट लिए । विक्रमजित सिंह र बास्ले लिडेले दुइ दुई तथा क्लेटोन फ्लोयड र आर्यान दत्तले एक एक विकेट लिए ।
नेपाललाई छनोटको सुपर सिक्समा स्थान बनाउन आजको खेल जित्नै पर्ने दबाब छ । नेदरल्यान्ड्सलाई हराएमात्र नेपालको सुपर सिक्स पुग्ने सम्भावना रहनेछ ।
समूह चरणमा नेपालको अन्तिम खेल हो भने नेदरल्यान्ड्सले सोमबार वेस्ट इन्डिजसँग खेल्नेछ । नेपाललाई अगाडि बढ्न आजको खेल जित्नुका सार्थ वेस्ट इन्डिजको खेलमा समेत नेदरल्यान्ड्स हार्नुपर्नेछ । आज पराजित भएका नेपालको सुपर सिक्स यात्रा सकिने छ ।
समूह ‘ए’ मा रहेको नेपाल पहिलो खेलमा घरेलु टोली जिम्बावेसँग आठ विकेटले पराजित भएको थियो । दोस्रो खेलमा अमेरिकालाई ६ विकेटले पराजित गरेको नेपाल तेस्रो खेलमा वेस्ट इन्डिजसँग १०१ रनले पराजित भएको थियो ।
यता दुई खेल सकेको नेदरल्यान्ड्स जिम्बावेसँग ६ विकेटले पराजित भएको थियो । अर्को खेलमा नेदरल्यान्ड्सले अमेरिकालाई पाँच विकेटले हराएको थियो ।
नेपाललाई हराएमा नेदरल्यान्ड्स सुपर सिक्समा पुग्नेछ । जिम्बावे जानुअघि दक्षिण अफ्रिकामा भएको अभ्यास खेलमा नेपाल नेदरल्यान्ड्ससँग नेपाल पराजित भएको थियो ।
नेपाल र नेदरल्यान्ड्सबीच यसअघि दुई वटा एक दिवसीय खेल भएका छन् । जसमा दुवै टोलीले एक एक खेल जितेका छन् । समूहमा नेपाल र नेदरल्यान्डको समान दुई दुई अङ्क छ ।
दुई खेलबाट वेस्ट इन्डिज र जिम्बावेले चार चार अङ्क बनाएको छ । वेस्ट इन्डिज र जिम्बावको सुपर सिक्स यात्रा लगभग तय भएको छ । वेस्ट इन्डिज र जिम्बावे पनि आजै भिड्दै छन् । तीन खेल हारेको अमेरिकाको भने सुपर सिक्स यात्रा सकिएको छ ।
१० टोली सहभागी छनोट खेलको समूह ‘बी’ मा श्रीलङ्का, आयरल्याण्ड, स्कटल्याण्ड, ओमान र संयुक्त अरब इमिरेट्स ९युएई० रहेका छन् । छनोट खेलमा समूहमा शीर्ष तीन टोली सुपर सिक्समा प्रवेश गर्नेछन् ।
सुपर सिक्समा प्रत्येक टोलीले एक अर्कासँग खेलेपछि शीर्ष दुई टोली फाइनल पुग्नेछन् । फाइनल पुग्ने दुई टोली आगामी अक्टोबर–नोभेम्बरमा भारतमा हुने एक दिवसीय विश्वकपमा छनोट हुनेछन् ।
भारतमा हुने विश्वकपमा कुल १० टोली सहभागी हुनेछन् । विश्वकपमा आयोजक भारत, पाकिस्तान, अस्ट्रेलिया, न्युजिल्यान्ड, बङ्गलादेश, इङ्गल्यान्ड, अफगानिस्तान र दक्षिण अफ्रिकाले स्थान बनाइसकेका छन् ।
प्रकाशित मिति: ९ असार २०८०, शनिबार
