२८ कार्तिक २०८३, शनिबार
काठमाडौं । नेपाली काँग्रेसका पूर्वसभापति एवं पूर्वप्रधानमन्त्री शेरबहादुर देउवाले शहीदहरूको बलिदानबाट बनेको काँग्रेस पार्टीलाई कसैले बन्दी बनाउन नसक्ने बएका छन् ।
शनिवार काँग्रेसको ललितपुर जिल्ला अधिवेशनमा बोल्दै देउवाले आफूलाई व्यक्तिगत रूपमा केही चाहना नभए पनि पार्टीका लागि अन्तिम समयसम्म लडिरहने बताएका छन् । पार्टीकै सहयोगका कारण आफू पाँचपटक प्रधानमन्त्री बन्न सफल भएको उल्लेख गर्दै उनले पार्टीप्रति आफ्नो ठूलो जिम्मेवारी रहेको बताएका छन् । उनले काँग्रेस धेरै शहीदहरूको बलिदानबाट बनेको पार्टी भएको स्मरण गर्दै शहीदको रगतले भिजेको पार्टीलाई कसैले बन्दी बनाउन नसक्ने जिकिर गरेका छन् । देउवाले आफूलाई अब केही बन्नु नरहेको भन्दै पार्टीका लागि अन्तिम सास रहुन्जेलसम्म संघर्ष गर्नु नै आफ्नो कर्तव्य भएको बताएका छन् ।
देउवाले भने, ‘मलाई व्यक्तिगत रूपमा केही पाउनु छैन । तर पार्टीका लागि अन्तिम सास रहुन्जेल संघर्ष गर्नु मेरो कर्तव्य हो । जुन पार्टीले मलाई पाँचपटक प्रधानमन्त्री बन्ने अवसर दियो, त्यो पार्टीप्रति मेरो जिम्मेवारी र समर्पण पनि उत्तिकै हुनुपर्छ । यो पार्टी कुनै व्यक्तिले बनाएको होइन । हजारौँ नेता तथा कार्यकर्ताको त्याग, संघर्ष र बलिदानबाट निर्माण भएको पार्टी हो । यसका लागि धेरै साथीहरूले आफ्नो जीवन बलिदान दिएका छन् । यो शहीदहरूको रगत र समर्पणले बनेको पार्टी हो । त्यसैले शहीदहरूको सपना, कार्यकर्ताको त्याग र जनताको विश्वासबाट बनेको यस पार्टीलाई कसैले आफ्नो नियन्त्रणमा राख्न सक्दैन । कसैले चाहँदैमा पार्टीको इतिहास, विचार र अस्तित्व समाप्त गर्न सक्दैन ।’
देउवाले पार्टीको इतिहास, योगदान र बलिदानको सम्मान गर्दै काँग्रेसको संरक्षण र एकताका लागि सबैले लाग्नुपर्ने सन्देश दिएका छन् ।
प्रकाशित मिति: २८ कार्तिक २०८३, शनिबार
