२८ कार्तिक २०८३, शनिबार
काठमाडौं । जनकपुरधामस्थित महेन्द्रनारायण निधी मिथिला संस्कृति केन्द्र अब राजर्षि जनक विश्वविद्यालयको मातहतमा सञ्चालन हुने भएको छ ।
लामो समयदेखि शहरी विकास मन्त्रालयको नियन्त्रणमा रहेको उक्त केन्द्रलाई थप प्रभावकारी बनाउन सरकारले विश्वविद्यालयलाई हस्तान्तरण गर्ने निर्णय गरेसँगै मिथिला संस्कृतिको अध्ययन र अनुसन्धानमा नयाँ आयाम थपिने अपेक्षा गरिएको हो । नेपाली काँग्रेसका नेता विमलेन्द्र निधीले शनिवार जनकपुरधाममा आयोजित एक कार्यक्रममा बोल्दै यस निर्णयले मिथिला संस्कृतिको प्रवद्र्धनमा कोसेढुङ्गा सावित हुने विश्वास व्यक्त गरेका छन् । उनले केन्द्रलाई विश्वविद्यालय मातहत ल्याउन महत्वपूर्ण भुमिका खेल्नेहरु प्रधानमन्त्री बालेन्द्र साहसहित अन्य मन्त्रीप्रति आभार प्रकट गरेका छन् । नेता निधीको पहलमा भएको यस निर्णयपछि अब केन्द्रको प्रशासनिक र शैक्षिक कार्यसञ्चालनको जिम्मा राजर्षि जनक विश्वविद्यालयको हुनेछ । यसअघि शहरी विकास मन्त्रालयअन्तर्गत रहेको यस भवनमा अब मिथिला संस्कृतिको अध्ययन, अनुसन्धान र पठनपाठनका कार्यक्रमहरू अघि बढाइनेछन् । जनकपुरधामस्थित शहरी विकास तथा भवन निर्माण डिभिजन कार्यालयले हालै विश्वविद्यालयलाई यससम्बन्धी औपचारिक पत्र पठाइसकेको छ ।
उनले भने, ‘आज मेरो लागि मात्र होइन, हामी सबैका लागि खुशी र गर्वको दिन हो । महेन्द्रनारायण निधि मिथिला संस्कृति केन्द्र अहिलेसम्म शहरी विकास मन्त्रालयअन्तर्गत सञ्चालन हुँदै आएकोमा मेरो अग्रसरता, साथीहरूको प्रयास र राजर्षि जनक विश्वविद्यालयको सहयोगमा अबदेखि यसको शैक्षिक तथा प्रशासनिक सञ्चालन विश्वविद्यालयको मातहतमा रहने निर्णय भएको छ । मिथिला संस्कृतिको अध्ययन, अनुसन्धान, पठनपाठन र प्रवद्र्धनका लागि विश्वविद्यालय नै सबैभन्दा उपयुक्त संस्था भएकाले यो निर्णय ऐतिहासिक र महत्वपूर्ण उपलब्धि हो । यसका लागि नेपाल सरकार, प्रधानमन्त्री बालेन्द्र साह, शिक्षामन्त्री, शहरी विकासमन्त्री तथा भूमि मन्त्रीज्यूप्रति हार्दिक आभार र धन्यवाद व्यक्त गर्दछु । यो निर्णय मिथिला संस्कृति संरक्षण र प्रवद्र्धनका लागि एउटा महत्वपूर्ण माइलस्टोन सावित हुनेछ भन्ने विश्वास लिएको छु ।’
कार्यक्रममा बोल्दै निधीले राजर्षि जनक विश्वविद्यालयको स्थापनादेखि नै आफूले सक्रिय भूमिका निर्वाह गरेको स्मरण गरेका छन् । विश्वविद्यालयका पदाधिकारीहरूसँगको समन्वयमा यस प्रक्रियालाई अगाडि बढाइएको जानकारी दिँदै उनले विशेष गरी शिक्षा तथा खेलकुदमन्त्री सस्मित पोखरेलले स्थलगत निरीक्षणपश्चात देखाएको अग्रसरताको प्रशंसा गरेका छन् । हाल विश्वविद्यालयमा नयाँ उपकुलपति श्यामनारायण लाभले पदभार सम्हालेसँगै शैक्षिक गतिविधिहरूलाई गति दिने प्रयास भइरहेको छ ।
प्रकाशित मिति: २८ कार्तिक २०८३, शनिबार
