१८ श्रावण २०८३, सोमबार
जर्मनी । म्युनिखमा शनिबार (१ अगस्ट) आयोजित ‘भजन जर्मनी’ कार्यक्रम भक्तिमय वातावरणबीच सम्पन्न भएको छ। मेन्स रुम रिलोडेड (एमआरआर) को आयोजनामा भएको कार्यक्रममा प्रवासी नेपाली समुदायको उल्लेखनीय सहभागिता रहेको थियो।
कार्यक्रममा भजन–कीर्तन प्रस्तुत गरिएको थियो। सामूहिक रूपमा गाइएका भजनले उपस्थित सहभागीलाई आध्यात्मिक अनुभूति दिलाउनुका साथै नेपाली धार्मिक तथा सांस्कृतिक परम्परासँग थप नजिक ल्याएको थियो।
भजनसँगै सहभागीहरूबीच भेटघाट, परिचय र विचार आदान–प्रदानको अवसर पनि मिलेको थियो। सहभागीहरूले यस्ता कार्यक्रमले प्रवासमा नेपाली समुदायबीच आपसी सद्भाव, आत्मीयता र एकतालाई बलियो बनाउने धारणा व्यक्त गरेका थिए।
आयोजक मेन्स रुम रिलोडेड (एमआरआर) का अनुसार, प्रवासमा रहेका नेपालीलाई आफ्नो धर्म, संस्कृति र मौलिक पहिचानसँग जोडिराख्ने उद्देश्यले ‘भजन जर्मनी’ आयोजना गरिएको हो। आगामी दिनमा पनि यस्ता आध्यात्मिक तथा सांस्कृतिक कार्यक्रमलाई निरन्तरता दिइने आयोजकले जनाएको छ।
प्रकाशित मिति: १८ श्रावण २०८३, सोमबार
