बोको हरामको आक्रमणमा १० नाइजेरियाली सैनिकको मृत्यु

काठमाडौं । पूर्वी नाइजेरियामा सक्रिय जिहादी समूहले गरेको आक्रमणमा कम्तीमा १० जना सरकारी सैनिक मारिएका छन्। स्थानीय स्रोत र नाइजेरियाली सञ्चारमाध्यमका अनुसार शुक्रबार डिफा प्रान्तको एनगुइग्मी नजिक भएको आक्रमणमा दुवै पक्षको क्षति भएको छ।

एनगुइग्मी चाड ताल क्षेत्रको रणनीतिक सहर हो, जहाँ नाइजेरिया, चाड र क्यामरुनको सीमा जोडिन्छ। बोको हरामका गतिविधि यस क्षेत्रमा लामो समयदेखि सक्रिय छन्। स्थानीय बासिन्दाका अनुसार आक्रमणमा करिब १० सैनिक मारिएका छन् भने प्रतिआक्रमणका क्रममा विद्रोही पक्षले पनि ठूलो क्षति बेहोरेको छ। घटनापछि नाइजेरियाली सेनाले प्रभावित क्षेत्रमा व्यापक सुरक्षा तथा खोजी अभियान सञ्चालन गरेको छ।

सामाजिक सञ्जालमा सार्वजनिक विवरणअनुसार आक्रमणमा १० सैनिकसँगै चार जना राष्ट्रिय गार्डका जवान पनि मारिएका छन्। यद्यपि, सरकारी समाचार संस्था एएनपीले केही सुरक्षाकर्मीको मृत्यु भएको पुष्टि गरे पनि आधिकारिक मृतक संख्या सार्वजनिक गरेको छैन।घटनापछि डिफा प्रान्तका गभर्नर जनरल महामादौ इब्राहिम एनगुइग्मी पुगेर आक्रमणमा ज्यान गुमाएका सुरक्षाकर्मीप्रति श्रद्धाञ्जली अर्पण गरेका छन्।

सन् २००९ देखि बोको हरामले उत्तर–पूर्वी नाइजेरियामा सुरु गरेको हिंसात्मक विद्रोहले हजारौंको ज्यान लिइसकेको छ भने लाखौं मानिस विस्थापित भएका छन्। विद्रोहको प्रभाव चाड, क्यामरुन र निजेरसम्म फैलिएको छ, जसलाई नियन्त्रण गर्न क्षेत्रीय सैन्य सहकार्य गरिए पनि पछिल्ला वर्षहरूमा अपेक्षित सफलता हासिल हुन सकेको छैन।