३० जेष्ठ २०८२, शुक्रबार
काठमाडौँ। परराष्ट्र मन्त्री डा. आरजु राणा देउवाले सगरमाथा संवादले नेपालका महत्वपूर्ण एजेण्डाहरूलाई विश्वमाझ नक्शाङ्कन गर्न सकेको बताएकी छिन् ।
वैदेशिक भ्रमण लगायत समसामयिक विषयहरूमा परराष्ट्र मन्त्रालयसँग छलफल गर्न शुक्रवार सिंहदरबारमा बसेको प्रतिनिधि सभाअन्तर्गतको अन्तर्राष्ट्रिय सम्बन्ध र पर्यटन समितिको बैठकमा बोल्दै उनले यस्तो बताएकी हुन् । उनले सगरमाथा संवादका परिणामहरूलाई कोप ३० मा पनि लिएर अगाडी बढ्ने बताईन । संयुक्त राष्ट्र सङ्घका महासचिवको कार्यालयदेखि लिएर वल्र्ड बैङ्क, एडिबी लगायतका प्रतिनिधिहरूले सहभागिता जनाएको बताउँदै नेपालका मुद्दा हरूलाई उच्च तहमा सुनुवाई भएको जिकिर गरीन । मन्त्री राणाले सगरमाथा संवादमा विभिन्न राष्ट्रका प्रमुखहरू आउन नसके पनि उच्च तहकै प्रतिनिधिहरूको सहभागिता भएको बताएकी छिन् । उनले पहिलो पटकको डायलग एकदमै राम्रो भएको बताउँदै छिमेकी मुलुकमा प्रतिनिधिहरूले पनि राम्रो प्रतिक्रिया दिएको दाबी गरीन ।
उनले भनीन, “हामी कहाँ उच्चस्तरीय सहभागिता भएन होला । राष्ट्र प्रमुखहरू आउन सक्नुभएन होला । तर, हामीकहाँ राम्रै सिनियर लेभलकै मान्छेहरूको चाइनाबाट पनि, इन्डियाबाट पनि सहभागिता भयो । त्यो हाम्रो पहिलो पटकको डायलग हो । पहिलो पटकमा नै यति राम्रो हाम्रो सहभागिता, प्रतिनिधित्व हुनु हामीलाई एकदमै राम्रो अनुभुति भएको छ । छिमेकी मुलुकका साथीहरूले पनि तपाईंहरूको पहिलो पटकको डायलग एकदमै राम्रो भयो भन्ने प्रतिक्रिया दिनुभएको छ । हामीले ७२ दिनको तयारीमा राखेको डायलग हो । हाम्रो उपलब्धि के हो भने, नेपालको यो एकदमै महत्वपूर्ण एजेन्डा भनेर हामीले ग्लोबल रूपमा यसको म्यापिङ गर्न सकेका छौँ । यसका परिणामहरू हामीले कोप–३० मा पनि लिएर अगाडी बढ्छौँ । यसमा संयुक्त राष्ट्र सङ्घका महासचिवको कार्यालयदेखि लिएर वल्र्ड बैङ्क, एडिबी लगायतका साथीहरूले सहभागिता जनाएर महत्वपूर्ण मुद्दा हरू के के हुन र नेपालले उठाएर कुराहरू के हो भन्ने विषयमा उच्च तहमा हाम्रो सुनुवाइ भएको छ जस्तो लागेको छ ।”
पहिलो पटकको संवाद गत मे १६ देखि १८ सम्म काठमाडौंमा आयोजना भएकी हुन् । “जलवायु परिवर्तन, पर्वत र मानवताको भविष्य” विषयमा केन्द्रित संवादले नेपालले जलवायु परिवर्तन, हिमाली क्षेत्रको संरक्षण र मानव भविष्यका लागि २५ बुँदे घोषणापत्र सार्वजनिक गर्दै समापन भएको थियो ।
प्रकाशित मिति: ३० जेष्ठ २०८२, शुक्रबार
