१३ चैत्र २०८१, बुधबार
काठमाडौँ। गृहमन्त्री रमेश लेखकले समाजमा लोकतान्त्रिक गणतन्त्रको विकल्प खोज्नुपर्छ भन्ने गलत भाष्य निर्माण गर्न खोजिएको आरोप लगाएका छन् ।
जुद्ध वारुण यन्त्र भक्तपुरको नवनिर्मित भवन उद्घाटन कार्यक्रमलाई सम्बोधन गर्दै उनले गणतन्त्रले केही पनि गर्न सकेन भन्ने आरोपको खण्डन गर्दै जनताको अवाज सुन्ने व्यवस्था नै लोकतान्त्रिक गणतन्त्र भएको बताए । उनले २०६१ सालमा तत्कालिन राजा ज्ञानेन्द्रले गरेको राजनीतिक कूको प्रसङ्ग कोट्याउँदै राजतन्त्रको पहिलो निशाना सञ्चारमाध्यम बनेको बताएका छन् । उनले जनताको अवाज कुल्चिएर लोकतन्त्र समाप्त पार्ने राजतन्त्र ठिक कि जनताको अवाज सुन्ने गणतन्त्र ठिक भन्दै प्रश्न गरे । लोकतान्त्रिक गणतन्त्रले गरेका कामको सञ्चारमाध्यमहरुले प्रचारप्रसार गर्नुपर्ने उनको भनाइ छ ।
उनले भने, ‘अहिले समाजमा नकारात्मक भाष्य निर्माण गर्ने प्रयास भइरहेको छ । लोकतन्त्रले केही गर्न सकेन । गणतन्त्रले केही गर्न सकेन । यसको विकल्प खोज्नुपर्छ भन्ने भाष्य निर्माण गर्ने कोसिस भैरहेको छ । यो अत्यन्त गलत कुरा हो । लोकतन्त्रले सञ्चारको कुरा सुन्छ,गणतन्त्रले जनताको कुरा सुन्छ । गणतन्त्रले लोकतन्त्रले जनताका आवश्यकता सुन्दो रहेछ, बुझ्दो रहेछ । अब त्यसैलाई अर्को पाटोमा हेर्नुस त । एक पटक केही वर्ष पहिला तत्कालिन राजाले कू गर्नुभएको थियो । लोकतन्त्रलाई समाप्त गरेर आफ्नो साशन लागू गर्नुभएको थियो । तपाईहरु कतिजनालाई सम्झना छ ? सबैभन्दा पहिला राजाले कू गर्दा नेपाली सेना, सशस्त्र प्रहरीलगायतका सुरक्षाकर्मी सबैभन्दा पहिला सञ्चारमाध्यमका अफिसमा गएका थिए । सम्झना छ ? एउटा आवाजले जनताका आवाज कुल्चिन्छ । एउटा आवाजले सञ्चारको अवाज कुल्चिन्छ । पत्रकारको आवाज कुल्चिन्छ । त्यो व्यवस्था भनेको राजाको व्यवस्था हो । लोकतन्त्रले जनताको आवाज सुन्छ, पत्रकारिताको अवाज सुन्छ । राजतन्त्र उचित व्यवस्था हो कि गणतन्त्र उचित व्यवस्था हो ? मैले भन्नै परेन नि ।’
वारुण यन्त्रको सेवा तीन रोपनी सात आना जग्गामा पाँच करोड ७६ लाख ९८ हजार लागतमा निर्मित नयाँ भवनबाट शुरु भएको छ । नवनिर्मित भवन २०८१ कातिक १ गते कार्यालयलाई हस्तान्रण गरिएको थियो । ३२ जनाको दरबन्दी रहेको कार्यालयमा हाल १५ जना फायर म्यान, चार जना भारी सवारी चालक, दुई जना हललदार र दुई जना क्लिफर, एक नासु, एक खरिदार, एक सहायक कम्प्युटर अपरेटर, एक सह लेखापाल र तीन जना कार्यालय सहयोगी रहेको जनाइएको छ ।
प्रकाशित मिति: १३ चैत्र २०८१, बुधबार
