५ चैत्र २०८१, मंगलवार
काठमाडौँ। नेपाली काँग्रेसका सभापति शेरबहादुर देउवाले कतिपय मानिसहरुले अझैपनि संघीयतालाई स्वीकार गर्न नसकेको टिप्पणी गरेका छन् ।
सोमवार पार्टी केन्द्रिय कार्यालयमा आयोजित ‘संघीयताकोप्रभावकारी कार्यान्वयनमा नेपाली काँग्रेसको भुमिका’ विषयक अन्तरक्रिया कार्यक्रममा बोल्दै सभापति देउवाले कतिपय मानिसहरुले बाध्यताले संघीयता स्वीकार गरेको टिप्पणी गरेका छन् । उनले कसैले चाहँदैमा संघीयता नफर्किने उल्लेख गर्दै यसलाई जनताप्रति थप उत्तरदायि बनाउन आवश्यक रहेको बताए । उनले मुलुक संघयितामा गइसकेपछि स्थानीय तह, प्रदेश र संघले आ—आफ्नै अधिकारप्राप्त गरेको भएपनि संघीयता सुदृढीकरण आवश्यक रहेको बताए । संघीयताको सफल कार्यान्वयनको लागि सबै राजनीतिक दलका नेतृत्वबीच छलफल हुनु आवश्यक रहेको समेत सभापति देउवाको भनाइ छ । मुलुकमा संघीयता आएपछि मात्र सबैले राज्यका संरचनामा सहभागिताको अवसर पाएको समेत उल्लेख गरेका छन् ।
उनले भने, ‘संघीयतालाई अझै प्रभावकारी बनाउने र जवाफदेही बनाउने कुरा आवश्यक छ । संघीयतालाई अझै कति मानिसले स्वीकार गरेका छैनन् । कतिले मन नपराई नपराई स्वीकार गरेका छन् । त्यसकारण संघीयता आइसक्यो यो फर्किने कुरा छैन । यसलाई अझै बढी नेपाली जनताका प्रति उत्तरदायि किसिमले जनताको सुखदुःखमा साथ दिने किसिमको संघीयता बनाउन आवश्यक छ । त्यसको लागि तुरुन्तै हुन्छ भन्ने छैन हेर्नुहोस् । समय लाग्न सक्छ । प्रदेशको आफ्नै भूमिका छ, आफ्नो अधिकार खोजिराखेको छ । संघको पनि आफ्नै अधिकार छ । त्यसकारण यसमा सबै पार्टीका साथिहरु बसेर संघीयताको प्रभावकारी कार्यान्वयनको लागि छलफल गर्नु आवश्यक छ । आफ्नो आफ्नो आफ्नो अधिकार माग्नु स्वाभाविक कुरा हो । तर हामीले मुलुकको आर्थिक अवस्थालाई हेरेर पनि कतिपय कामहरु गर्नुपर्ने हुन्छ ।’
उनले मुलुकको सम्प्रदायिक एकतालाई खल्बल्याउने काम भइरहेको भन्दै यसकाविरुद्ध सबै एकजुट हुन सकेत आग्रह गरेका छन् ।
प्रकाशित मिति: ५ चैत्र २०८१, मंगलवार
