८ माघ २०८०, सोमबार
काठमाडौं। पछिल्लो २४ घण्टामा देशका विभिन्न स्थानमा भएका दुर्घटनाहरूमा कम्तीमा १२ जनाको मृत्यु भएको छ । मोरङको लेटाङ नगरपालिका-५ खेरुवास्थित सडकमा को.१८ प ६२८२ नम्बरको मोटरसाइकल अनियन्त्रित भई आइतबार दिउँसो दुर्घटना हुँदा मोटरसाइकलमा सवार सोही नगरपालिका-२ बस्ने १८ वर्षीय जेनिस राईको मृत्यु भएको हो ।
उक्त दुर्घटनामा गम्भीर घाइते भएका उनको न्यूरो अस्पताल विराटनगरमा उपचारको क्रममा मृत्यु भएको हो । सो दुर्घटनामा घाइते भएका मोटरसाइकल चालकको सोही अस्पतालमा उपचार भइरहेको छ ।
त्यस्तै, लमजुङको दोर्दी गाउँपालिका-४ सिमल बिसौनीस्थित सडकमा ग.१ ज ७५६१ नम्बरको बोलेरो आइतबार साँझ दुर्घटना हुँदा बोलेरोमा सवार सोही गाउँपालिका-४ बासबोट बस्ने ४५ वर्षीय पूर्णबहादुर तामाङको मृत्यु भएको छ । उक्त दुर्घटनामा गम्भीर घाइते भएका उनको लमजुङ अस्पतालमा उपचारको क्रममा मृत्यु भएको हो ।सो दुर्घटनामा घाइते भएका बोलेरोमा सवार अन्य २ जनाको सोही अस्पतालमा उपचार भइरहेको छ । बोलेरो चालकलाई प्रहरीले नियन्त्रणमा लिएको छ ।
त्यसैगरी तनहुँको देवघाट गाउँपालिका-२ कोटबैदी भोक्टेनीस्थित सडकमा ग.१ ख ४१८१ नम्बरको मिनी ट्रक सडक देखि करिब ५ सय मिटर तल खसेर आइतबार राति दुर्घटना हुँदा ट्रकमा सवार २ जनाको मृत्यु भएको छ । मृत्यु हुनेहरूमा देबघाट गाउँपालिका-३ दगारा बस्ने ६५ वर्षीय नर बहादुर गुरुङ र ४५ वर्षीया बिमाया गुरुङ रहेका छन् भने सो दुर्घटनामा गम्भीर घाइते भएका उनीहरूको दमौली अस्पतालमा उपचारको क्रममा मृत्यु भएको हो । हाल फरार ट्रक चालकको प्रहरीले खोजी गरिरहेको छ ।
त्यस्तै, रूपन्देहीको लुम्बिनी सांस्कृतिक नगरपालिका-३ लंकापुरस्थित सडकमा लु.५८ प २७२८ नम्बरको मोटरसाइकल र युपि ५५ एएन १११२ नम्बरको मोटरसाइकल एकआपसमा ठक्कर खाई आइतबार साँझ दुर्घटना हुँदा दुवै मोटरसाइकल चालकको मृत्यु भएको छ । उक्त दुर्घटनामा गम्भीर घाइते भएका लु.५८ प २७२८ नम्बरको मोटरसाइकल चालक कपिलबस्तु शुद्धोधन गाउँपालिका-५ बस्ने ४५ वर्षीय शिव शंकर यादव र युपि ५५ एएन १११२ नम्बरको मोटरसाइकल चालक भारत सिद्धार्थनगर ग्राम कक्रहवा बस्ने ३० वर्षीय जय प्रकाश गुप्ताको भीम अस्पताल भैरहवामा उपचारको क्रममा मृत्यु भएको हो ।
त्यस्तै कास्कीको पोखरा महानगरपालिका-११ काहुँस्थित सडकमा ग.१३ प ६४२५ नम्बरको मोटरसाइकल अनियन्त्रित भई आइतबार राति दुर्घटना हुँदा मोटरसाइकलमा सवार सोही महानगरपालिका-१३ कमलपोखरी बस्ने १६ वर्षीय सन्तोष रोक्का मगरको मृत्यु भएको छ । उक्त दुर्घटनामा गम्भीर घाइते भएका उनको पश्चिम क्षेत्रिय अस्पतालमा उपचारको क्रममा मृत्यु भएको हो भने मोटरसाइकल चालकलाई प्रहरीले नियन्त्रणमा लिएको छ ।
त्यस्तै दाङको लमही नगरपालिका-९ झ्वाडीस्थित सडकमा प्र.३-०१-००५ ख ९७१९ नम्बरको बस अनियन्त्रित भई आइतबार राति दुर्घटना हुँदा बसमा सवार बर्दिया गेरूवा गाउँपालिका-१ थापापुर बस्ने ३६ वर्षीय भीम नाथ योगी र बर्दिया मधुवन नगरपालिका बस्ने युवराज चौधरीको घटनास्थलमै मृत्यु भएको छ । दुर्घटनामा घाइते भएका चालक समेत २ जनालाई उपचारको लागि नर्सिङ होम नेपालगन्ज बाँके पठाइएको छ ।
पाल्पाको रम्भा गाउँपालिका-१ भुमरस्थित सडकमा ग.१४ प ३७५ नम्बरको मोटरसाइकल आइतबार राति दुर्घटना हुँदा चालक रम्भा गाउँपालिका-१ असर्दी बस्ने २८ वर्षीय हेमन्त जिटीको घटनास्थलमै मृत्यु भएको छ ।
त्यस्तै, कैलालीको घोडाघोडी नगरपालिका-२ पाण्डेचोकस्थित सडकमा ना.४ ख १३६५ नम्बरको टिपर अनियन्त्रित भई आइतबार राति दुर्घटना हुँदा टिपरमा सवार बाँके कोहलपुर नगरपालिका-७ बस्ने २४ वर्षीय दिन दयाल थारुको मृत्यु भएको छ । उक्त दुर्घटनामा गम्भीर घाइते भएका उनको कोहलपुर मेडिकल कलेज बाँकेमा उपचारको क्रममा मृत्यु भएको हो । सो दुर्घटनामा घाइते भएका टिपर चालकको निसर्ग अस्पताल धनगढीमा उपचार भइरहेको छ ।
त्यसैगरी धनुषाको मुखियापट्टी मुसहरनिया गाउँपालिका-४ फेचहा मोडस्थित सडकमा हाल नम्बर नखुलेको मोटरसाइकल अनियन्त्रित भई गएराति दुर्घटना हुँदा चालक महोत्तरी एकडारा गाउँपालिका-४ हलखोरी बस्ने सिताराम मुखियाको छोरा २५ वर्षीय किशन मुखियाको मृत्यु भएको छ । उक्त दुर्घटनामा गम्भीर घाइते भएका उनको प्रादेशिक अस्पताल जनकपुरमा उपचारको क्रममा मृत्यु भएको हो । सो दुर्घटनामा सम्बन्धमा प्रहरीले आवश्यक अनुसन्धान गरिरहेको छ ।
प्रकाशित मिति: ८ माघ २०८०, सोमबार
