७ माघ २०८०, आईतवार
काठमाडौं। त्रिवि उपकुलपति कप आजदेखि सुरु हुँदै छ । उक्त प्रतियोगिताको आज एक समारोहकाबीच ललितपुरको जावलाखेलमा उद्घाटन हुन लागेको हो ।
त्रिवि विद्यार्थी कल्याण तथा खेलकुद निर्देशनालयको आयोजनामा हुने यो प्रतियोगिता ११ गतेसम्म सञ्चालन हुनेछ भने ११ गतेसम्म चल्ने सो प्रतियोगितामा भलिबलसहित बास्केटबल, एथ्लेटिक्स, ब्याडमिन्टन र टेबलटेनिस गरी ५ खेलको प्रतिस्पर्धा हुनेछ ।
आजै जावलाखेल भलिबल प्रशिक्षण केन्द्रमा भलिबलका खेल सुरु हुनेछन् । त्यसअघि उद्घाटन समारोह हुनेछ । बास्केटबल खेलहरु आजदेखि नै सुरु हुनेछन् र ११ गते फाइनल हुनेछ भने बास्केटबलका खेलहरु कीर्तिपुर नगरपालिकाको कभर्डहलमा हुनेछ ।
उक्त खेलको शनिबार आयोजकले टाइसिट सार्वजनिक गरिसकेको छ । जसमा भलिबलतर्फ त्रिविअन्तर्गत रहेका देशका विभिन्न स्थानका २७ क्याम्पसले नकआउटका आधारमा प्रतिस्पर्धा गर्नेछन् । त्यसैगरी बास्केटबलमा १९ टोली सहभागी छन् । जसलाई ८ समूहमा विभाजन गरिएको छ । ५ समूहमा २/२ तथा ३ समूहमा तीनरतीन टोली समावेश गरिएको छ भने यसमा लिग चरणको खेलपछि प्रिक्वाटरफाइनल खेल हुनेछ ।
त्यसैगरी, ब्याडमिन्टनमा महिला सिंगल्स, पुरुष सिंगल्स, महिला डबल्स र पुरुष डबल्समा प्रतिस्पर्धा हुनेछ । ब्याडमिन्टन प्रतियोगिता त्रिभुवन विश्वविद्यालय, स्मृतिभवन हुनेछ। यस्तै टेबलटेनिसमा महिला सिंगल्स र पुरुष डबल्स गरी दुई विधामा मात्र खेल हुनेछ भने टेबल टेनिस प्रतियोगिता त्रिभुवन विश्वविद्यालय खेल विज्ञान भवन (पुरानो विद्यार्थी क्लव, त्रिवि सेवा आयोग अगाडि) हुनेछ ।
एथलेटिक्स प्रतियोगिता भने त्रिपुरेश्वरस्थित दशरथ रंगशाला माघ १० गते बिहान ८ बजेदेखि हुने हुनेछ । एथ्लेटिक्समा सबैभन्दा धेरै खेलाडी सहभागी छन् ।
राष्ट्रिय खेलकुद परिषद (राखेप) ले यही माघ चौथो साता युनिभर्सिटी कप खेलकुद आयोजना गर्न लागेको छ । त्यसैको तयारी स्वरुप विभिन्न क्याम्पसबाटै खेलाडीहरुको प्रतिभा पहिचान गर्ने उदेश्यले त्रिविले विभिन्न खेलको प्रतियोगिता गर्न लागेको हो ।
प्रकाशित मिति: ७ माघ २०८०, आईतवार
