१९ मंसिर २०८०, मंगलवार
काठमाडौं। काठमाडौं महानगरपालिकाका कर्मचारीहरूले कार्डिपल्मोनरी रिससिटेसन (सीपीआर) को आधारभूत तालिम लिएका छन् ।
उक्त महानगरका अनुसार विपद् क्षति न्यूनीकरणका लागि पूर्वतयारी, विपदका समयको प्रतिकार्य र त्यसपछिको पुनः स्थापनामा वडाले निर्वाह गर्नुपर्ने भूमिका, यसका लागि जान्नुपर्ने आधारभूत ज्ञान र व्यवस्थापनका लागि हुनैपर्ने सीप विकासका लागि आयोजना गरिएको हो । त्यस्तै, सीपीआर जीवनको अन्तिम अवस्थामा पुगेका व्यक्तिको फोक्सो र मुटुको गतिलाई पुनः स्थापना गर्ने प्रक्रिया हो । व्यक्ति जुनसुकै समयमा पनि यो अवस्थामा पुग्न सक्छ भने त्यसबेला स्वास्थ्यकर्मी नहुन सक्छन् ।
सो आयोजना गरिएको ३ दिने तालिम (मङ्सिर १५, १६ र १७ गते) को अन्तिम दिन यसको अभ्यास गरिएको हो । महानगरको विपद् व्यवस्थापन विभागले आयोजना गरेको तालिममा वडा सचिव, इन्जिनियर र विपदका समयमा सक्रिय हुनुपर्ने विभागहरू (प्रशासन, लेखा) का अधिकारीहरू सहभागी थिए ।
यस अवस्थामा सीपीआर बुझेका व्यक्तिले सीपीआर गरेर अवस्थालाई सामान्य बनाउने प्रयास गर्न सक्छ ।
प्रकाशित मिति: १९ मंसिर २०८०, मंगलवार
