२७ असार २०८०, बुधबार
२७,असार ,काठमाडौँ । देशका विभिन्न भागमा दलितमाथि भएका दुव्र्यवहार र अत्याचारका घटनाप्रति मानव अधिकार तथा शान्ति समाज काठमाडौँले सरोकार भएका निकायको ध्यानाकर्षण गराएको छ ।
देशका विभिन्न भागमा दलितमाथि भएको दुव्र्यवहार र अत्याचारका घटनाका सन्दर्भमा चासो व्यक्त गर्दै शान्ति समाजको काठमाडौँ शाखाले जातीय छुवाछूतविरुद्ध सामाजिक अभियान चलाएको हो । शान्ति समाज काठमाडौँ शाखाले शान्ति स्तूप बौद्धनाथ अगाडि एक प्रदर्शनीको आयोजना गरेको थियो ।
‘जातीय भेदभाव अन्त्य गरौँ : मानव अधिकारको सम्मान गरौँ, दलित अधिकार : मानव अधिकार, दलित विभेदको अन्त्य : मानव अधिकारको गन्तव्य, सबैका लागि सबै मानव अधिकार’ जस्ता नारा लेखिएका प्लेकार्डसहित ६० जनाभन्दा ज्यादा अधिकारकर्मीले प्रदर्शन गरेका थिए ।
कार्यक्रममा शान्ति समाजका केन्द्रीय सभापति रामकृष्ण बराल, सल्लाहकार उत्तम पुडासैनी, पूर्वसभापति होमकान्त चौँलागाईं, सामाजिक अभियानकर्मी श्रीराम चालिसे लगायतले दलित अधिकारको सम्मान गर्न आग्रह गरेका थिए ।
प्रकाशित मिति: २७ असार २०८०, बुधबार
