८ जेष्ठ २०८०, सोमबार
८ जेठ, एजेन्सी । युक्रेनका राष्ट्रपति भोलोदिमिर जेलेन्स्कीले युक्रेनको बखमुत शहरको ‘विनाश’ लाई सन् १९४५ मा अमेरिकी आणविक बमले आक्रमण गरेपछि हिरोशिमामा भएको विनाशसँग तुलना गर्नुभएको छ ।
युद्धपूर्व ७० हजार जनसङ्ख्या भएको बखमुत रूसको आक्रमणको सबैभन्दा लामो र रक्तपातपूर्ण युद्धको दृश्य बनेको छ ।
महिनौँसम्म चलेको भीषण लडाइँको समयमा बखमुतबाट यदाकदा देखाइएका दृश्यहरूमा उक्त स्थानलाई भग्नावशेषको शहर देखाइएको छ ।
जेलेन्स्कीले भने, “हिरोसिमाको फोटोले मलाई बखमुतको सम्झना गराउँछ । त्यहाँ केही पनि जीवित छैन ।”
उनले भने, “सबै भवनहरू ध्वस्त भएका छन् । पूर्ण रूपमा विनाश भएका छन् । त्यहाँ मानिसहरू छैनन् अर्थात् केही पनि छैन ।”
जेलेन्स्कीले जापानले हिरोशिमामा गरेको पुनर्निर्माणले आक्रमणमा ध्वस्त भएका युक्रेनी शहर र शहरहरूको पुनर्निर्माण गर्न प्रेरित गरेको बताए ।
“अहिले, हिरोशिमाको पुनर्निर्माण भएको छ । शहर राम्रो उदाहरण बनेको छ,” उनले भने ।
उनले थपे, “हामी हाम्रा सबै शहरहरू पुनर्निर्माण गर्ने सपना देख्छौं जुन अहिले भग्नावशेषमा छन् । रूसी आक्रमणपछि धेरै गाउँमा एउटा पनि घर बाँकी छैन ।”
रूसले बखमुतलाई पूर्ण रुपमा नियन्त्रणमा लिएको दाबी गरेको एक दिनपछि जेलेन्स्कीले यस्तो बताएका हुन् । उनले स्पष्ट जवाफ नदिइकन रूसी सेना बखमुतमा रहेको तर त्यसलाई कब्जामा नलिएको बताए ।
प्रकाशित मिति: ८ जेष्ठ २०८०, सोमबार
