२ श्रावण २०८२, शुक्रबार
काठमाडौँ। संस्कृति, पर्यटन तथा नागरिक उड्डयनमन्त्री बद्री पाण्डेले हिमालय क्षेत्रमा देखिएको जलवायु परिवर्तनको असर न्युनिकरण र आदिवासी जनजातिका आवश्यकता सम्बोधनका लागि सरकार गम्भीर रूपमा अघि बढ्ने बताएका छन् ।
शुक्रवार सानेपास्थित पार्टी केन्द्रीय कार्यालयमा आयोजित लोकतन्त्रवादी आदिवासी जनजाति महासंघको स्थापना दिवस कार्यक्रममा बोल्दै मन्त्री पाण्डेले यस्तो बताएका हुन् । बढ्दो तापक्रम वृद्धिका कारण हिमालहरु पग्लिन थालेको उल्लेख गर्दै उनले हिमालको संरक्षणमा सरकारको ध्यान जानु जरुरी रहेको बताए । उनले संस्कृति मन्त्रालयको नेतृत्वमा रहँदा आदिवासी जनजातिका आवश्यकता सम्बोधन हुनेगरी नीति, कानुन र संरचना तयार पार्ने प्रतिवद्धता पनि व्यक्त गरे ।
उनले भने, ‘जलवायु परिवर्तनका असरहरु रक्षा गर्ने, हिमालहरु काला भइरहेका छन्, तामक्रमले हिमालमा गरिरहेको असरलाई कम गर्ने दिशामा सरकार अगाडी बढ्नुपर्छ । हामीले गौरव गर्नुपर्ने विषयहरु नेपाल हिमालका नामले चिनिन्छ, हिमाल शेर्पाका नामले चिनिन्छ । शेर्पाले हिमाललाई चिनाएका छन् । म सभापतिज्युलाई साक्षी राखेर के भन्छु भने संस्कृति मन्त्रालयको हामीले नेतृत्व लिएको समयमा हामी राम्रो नीति पनि बनाउँछौं । जसले गर्दा आदिवासी, जनजातीका आवश्यकताहरुलाई सम्बोधन गर्नेगरी हाम्रा नीति, कानून र संरचना पनि बन्नेछन् । हाम्रा संरचनालाई पनि हामी परिचालन गर्नेछौं । ति संरचनामा राम्रो संंस्कार र प्रवृीत्त बसाल्नेगरी हामी बढ्नेछौं ।’
उनले सबै समूदायको संस्कृति र सभ्यता संरक्षका लागि सबैको समन्वय र सहकार्य आवश्यक रहेको पनि बताए ।
प्रकाशित मिति: २ श्रावण २०८२, शुक्रबार
