२ श्रावण २०८२, शुक्रबार
काठमाडौँ। नेपाली काँग्रेसका महामन्त्री गगनकुमार थापाले काँग्रेसको अस्तित्व र भुमिकालाई कमजोर पार्ने प्रयास भइरहेको भन्दै पार्टी कार्यकर्ताहरुलाई दृढका साथ अघि बढ्न आग्रह गरेका छन् ।
शुक्रवार पार्टी केन्द्रिय कार्यालय सानेपामा पार्टीनिकट लोकतन्त्रवादी आदिवासी जनजाति महासंघको स्थापना दिवसको अवसरमा आयोजित कार्यक्रममा बोल्दै महामन्त्री थापाले यस्तो आग्रह गरेका हुन् । पछिल्लो समय काँग्रेसको बारेमा पार्टीले भन्दा पहिले अरुले टिप्पणी गर्ने गरेको भन्दै पार्टीको महत्व र आवश्यकताबारे आफैंले भन्नुपर्ने उनको भनाइ छ । महामन्त्री थापाले आदिवासी जनजाति समुदायले प्राप्त गरेका अधिकार र पहिचानको रक्षा गर्ने प्रमुख शक्ति नै नेपाली काँग्रेस रहेको दाबी गरे । उनले आदिवासी जनजातिको मुद्दामा काँग्रेस बाहेक अरु कुनैपनि पार्टी इमादार नरहेको उनको टिप्पणी छ ।
उनले भने, ‘अहिले हाम्रो सबैभन्दा ठुलो समस्या के भएको छ भने अहिले नेपाली काँग्रेसको बारेमा हामीभन्दा अरुले भनिदिएको छ । हामी को हौ भन्नेबारेमा हामीले भन्नै पाएका छैनौं । हामीभन्दा पहिले अरुले गएर भनिदिन्छ । यी पुराना हुन्, थोत्रा हुन् भनेर भनिदिने भए । अब हाम्रो बारेमा कसले भन्ने ? हामी आफैंले भन्ने हो । हामी नभएको भए के हुन्थ्यो ? र हामी नभयौं भने के हुन्छ अब ? यी कुराहरु महासंघले भनिदिनुपर्नेछ । नेपालको जनजाति र आदिवासीले प्राप्त गरेको अधिकार आजको दिनमा काँग्रेसले अलिकति खुट्टा डगमगाउने हो भने यो अधिकार सबै स्वहा भएर जान्छ । अरु कोही यो मुद्दाप्रति इमानदार छैन । हामी रातारात भित्तामा लेखेर यो ठाउँमा आएको होइन । हामी सिकेर आएको हो हामी आफ्नो मुद्दामा इमानदार छौं ।’
महामन्त्री थापाले आउँदो असोजसम्म पार्टी सदस्यता नविकरण गरिसक्ने समेत बताए । आउँदो मसिंरदेखि नयाँ सदस्यता वितरण गर्नेगरी काम भइरहेको उनको भनाइ छ ।
प्रकाशित मिति: २ श्रावण २०८२, शुक्रबार
