२७ कार्तिक २०८३, शुक्रबार
काठमाडौं । काठमाडौँबाट बल्खु–दक्षिणकाली हुँदै हेटौँडा जाने यात्रुवाहक भाडाका तथा सार्वजनिक सवारीसाधन सञ्चालनमा जिल्ला प्रशासन कार्यालय काठमाडौँले कडाइ गरेको छ।
सडक दुर्घटना बढ्दै गएको र यात्रुको सुरक्षामा जोखिम देखिएको भन्दै जिल्ला सुरक्षा समितिले सवारी सञ्चालनका लागि नयाँ समयसीमा निर्धारण गरेको हो। जिल्ला प्रशासन कार्यालय काठमाडौँले जारी गरेको अत्यन्त जरुरी सूचनाअनुसार उक्त सडकखण्ड हुँदै हेटौँडा जाने यात्रुवाहक तथा सार्वजनिक सवारीसाधन साँझ ८ बजेभित्र फर्पिङस्थित प्रहरी चेकपोस्ट पुगिसक्नुपर्नेछ।
त्यस्तै, बिहान ५ बजेपछि मात्रै बल्खुबाट उक्त रुटमा सवारी सञ्चालन गर्न पाइने व्यवस्था गरिएको छ। प्रशासनले यात्रुवाहक तथा सार्वजनिक सवारीसाधनको अवस्था पूर्ण रूपमा जाँच गरेर मात्रै सञ्चालन गर्न निर्देशन दिएको छ। साथै, काठमाडौँ जिल्लाभित्र पर्ने उक्त सडकखण्डमा खटिएका प्रहरी युनिट तथा ट्राफिक प्रहरीले कडाइका साथ सवारीसाधनको अनिवार्य जाँच गर्ने व्यवस्था मिलाइने सूचनामा उल्लेख छ।
साँघुरा सडक, तीव्र गति, चालकको लापरबाही तथा रातिको समयमा यात्रा गर्दा हुने जोखिमका कारण दुर्घटना बढेको प्रशासनको भनाइ छ।
यात्रुको सुरक्षा र सम्भावित दुर्घटना न्यूनीकरण गर्ने उद्देश्यले प्रशासनले उक्त व्यवस्था लागू गरेको जनाएको छ।
प्रकाशित मिति: २७ कार्तिक २०८३, शुक्रबार
