१३ कार्तिक २०८३, शुक्रबार
काठमाडौँ । सरकारी स्वामित्वको दुग्ध विकास संस्थान (डीडीसी) मा १२ करोड १३ लाख रुपैयाँभन्दा बढी अनियमितता गरी संस्थानलाई आर्थिक हानि पुर्याएको आरोपमा तत्कालीन महाप्रबन्धकसहित ८ जना पक्राउ परेका छन्।
केन्द्रीय अनुसन्धान ब्युरो (सीआईबी) का अनुसार पक्राउ पर्नेमा तत्कालीन महाप्रबन्धक सञ्जिव झासहित उच्च तहका कर्मचारी तथा चिस्यान केन्द्रका पूर्वप्रमुखहरू छन्। प्रारम्भिक अनुसन्धानमा उनीहरूले सङ्गठित सञ्जाल बनाएर संस्थानलाई १२ करोड १३ लाख ४३ हजार ५३० रुपैयाँ हानि पुर्याई गैरकानुनी लाभ लिएको आरोप छ।
पक्राउ परेका आठै जनाविरुद्ध आपराधिक विश्वासघात तथा सङ्गठित अपराधसम्बन्धी कसुरमा अनुसन्धान अघि बढाइएको सीआईबीले जनाएको छ। उनीहरूलाई कात्तिक १३ गते विभिन्न स्थानबाट पक्राउ गरिएको हो।
प्रकाशित मिति: १३ कार्तिक २०८३, शुक्रबार
