रामबहादुर बम्जन निर्दोष ठहर

काठमाडौँ । सम्पत्ति शुद्धीकरण सम्बन्धी मुद्दामा रामबहादुर बम्जनले अदालतबाट सफाइ पाएका छन्। जिल्ला अदालत सर्लाहीले अभियोग प्रमाणित हुन नसकेको ठहर गर्दै उनलाई निर्दोष घोषणा गरेको हो।

न्यायाधीश महेन्द्रराज काफ्लेको इजलासले आइतबार सुनुवाइ गर्दै बम्जनविरुद्ध दायर मुद्दामा पर्याप्त प्रमाण नदेखिएको निष्कर्ष निकालेको हो। यसअघि वैशाख ८ गतेको आदेशमार्फत अदालतले अभियोग पुष्टि नहुने संकेत गरेको थियो।

प्रहरीको केन्द्रीय अनुसन्धान ब्यूरो (सीआईबी)ले बम्जनलाई २०८० पुस १४ गते काठमाडौँको बुढानीलकण्ठ क्षेत्रबाट पक्राउ गरेको थियो। पक्राउपछि उनीमाथि सम्पत्ति शुद्धीकरणसम्बन्धी कसुरमा अनुसन्धान गर्दै मुद्दा दर्ता गरिएको थियो।

लामो अनुसन्धान र कानुनी प्रक्रियापछि अन्ततः अदालतले प्रमाणको अभाव देखाउँदै बम्जनलाई सफाइ दिएको छ।