१९ चैत्र २०८२, बिहीबार
काठमाडौँ । माध्यमिक शिक्षा परीक्षा (एसईई) आज बिहीवारदेखि देशभर शुरु भएको छ । परीक्षा बिहान ८ बजेदेखि शुरु भएको हो ।
यस वर्ष कुल ५ लाख १२ हजार ४ सय ७१ जना विद्यार्थी परीक्षामा सहभागी हुँदैछन् । परीक्षाका लागि देशभर १ हजार ९ सय ६५ वटा तथा जापानमा १ वटा गरी कुल १ हजार ९ सय ६६ परीक्षा केन्द्र तोकिएका छन् । ११ हजार ३ सय ७९ विद्यालयका विद्यार्थी यस परीक्षामा सामेल छन् । उप–नियन्त्रक विष्णुप्रसाद ज्ञावलीकाअनुसार सबैभन्दा बढी परीक्षार्थी काठमाडौं जिल्लामा छन् । काठमाडौंका १३५ परीक्षा केन्द्रबाट ४१ हजार १ सय ५५ जना विद्यार्थीले परीक्षा दिनेछन् । सबैभन्दा कम मनाङ जिल्लामा एउटा परीक्षा केन्द्रबाट मात्र ३७ जना विद्यार्थी सहभागी हुँदैछन् । जापानको परीक्षा केन्द्रबाट २३ जना विद्यार्थीले परीक्षा दिनेछन् । यस वर्ष ग्रेड वृद्धिका लागि ६५ हजार ८ सय ९५ जना विद्यार्थी पनि परीक्षामा सामेल छन् । एक पटक असफल भएका विद्यार्थीलाई कम्तीमा तीन पटक परीक्षा दिने अवसर दिइएको छ । २०७९ सालमा नियमित परीक्षामा सहभागी भई अझै उत्तीर्ण हुन नसकेका विद्यार्थी पनि यस पटक परीक्षामा छन् ।बालसुधार गृहमा रहेका विद्यार्थीका लागि नजिकको परीक्षा केन्द्रमार्फत विशेष व्यवस्था मिलाइएको छ । केन्द्राध्यक्षले प्रश्नपत्र र उत्तरपुस्तिका सहित निरीक्षक पठाएर बालसुधार गृहमै परीक्षा सञ्चालन गर्नेछन् । विशेष क्षमता तथा अपाङ्गता भएका विद्यार्थीका लागि पनि आवश्यकता अनुसार अतिरिक्त समय र लेखन सहयोगीको व्यवस्था गरिएको छ ।
३ घण्टाको परीक्षामा उनीहरूलाई १ घण्टा ३० मिनेट थप समय दिइनेछ । लेखन सहयोगीका रूपमा कक्षा ९ सम्म अध्ययनरत विद्यार्थीलाई तोकिनेछ । परीक्षा नियन्त्रण कार्यालयले यस वर्ष एसईईको नतिजा एक महिनाभित्र प्रकाशन गर्ने तयारी गरेको छ । परीक्षाकेन्द्रमै उत्तरपुस्तिका जाँच गर्ने, सोही दिन मार्कस्लिप शिक्षा विकास तथा समन्वय इकाईमा पठाउने र इकाईले तोकिएको समयमा परीक्षा नियन्त्रण कार्यालय पठाउने व्यवस्था मिलाइएको छ ।
प्रकाशित मिति: १९ चैत्र २०८२, बिहीबार
