१८ चैत्र २०८२, बुधबार
काठमाडौँ । आगामी शुक्रवार काभ्रेपलाञ्चोकमा तय एनएनआइपिए स्पोट्र्स अवार्डको २०औं संस्करणको तयारी पूरा भएको छ ।
नेपाल राष्ट्रिय तथा अन्तर्राष्ट्रिय खेलाडी संघ (एनएनआइपिए) को आयोजनामा आगामी चैत २० गते उक्त अवार्ड आयोजना हुँदैछ । पहिलोपल्ट उपत्यकाबाहिर अवार्ड हुन लागेकको अवार्ड बनेपा नगरपालिकास्थित चण्डेश्वरी मन्दिरमा सञ्चालन हुनेछ । खेलाडी संघले बुधबार पत्रकार सम्मेलन आयोजना गर्दै अवार्डको तयारी पूरा भएको जानकारी दिएको हो । नेपाल ओलम्पिक कमिटी (एनओसी) मा आवद्ध २६ खेल विधाका खेलाडी यस अवार्डमा पुरस्कृत हुँदैछन् । वर्ष २०८१ भर उत्कृष्ट प्रदर्शन गर्ने २६ खेल विधाका समान एक खेलाडी यो अवार्डबाट सम्मानित हुनेछन् । संघका महासचिव शिवसुन्दर गोथेले अवार्डको लागि सम्पूर्ण तयारी पूरा भएको जानकारी दिँदै यसपल्ट पनि कार्यक्रम भव्य र व्यवस्थित हुने विश्वास व्यक्त गरे ।
यस संस्करणको स्थानीय आयोजक बनेपा नगरपालिकाका मेयर शान्तिरत्न शाक्यले देशका खेलाडीहरूलाई आफ्नो नगरभित्र स्वागत गर्न उत्साहित रहेको र अवार्ड आयोजनाका लागि तयार रहेको बताए । अवार्डमा २६ खेलका उत्कृष्टका साथै समान एक महिला र पुरुष सर्वोत्कृष्ट खेलाडीलाई सम्मान गरिनेछ । खेलाडी संघले समान १/१ जना पाका खेल व्यक्तित्वलाई गजराज आदर्श खेल व्यक्तित्व, एक जना पत्रकारलाई एनएनआइपिए खेल पत्रकारिता पुरस्कार र पारा वर्ष उत्कृष्ट खेलाडीलाई सम्मान गर्नेछ । दुई जना सर्वोत्कृष्ट खेलाडी नगद एक लाख रुपैयाँ, वर्ष महिला र पुरुष प्रतिभाशाली खेलाडी समान ५० हजार, गजराज आदर्श खेल व्यक्तित्व र पत्रकारले ३५ हजार तथा पारा खेलाडी १५ हजार नगदसहित सम्मानित हुनेछन् ।
सम्बन्धित संघको सिफारिसका आधारमा २६ खेल विधाका खेलाडी सम्मानित हुने परम्परता रहेको छ । उनीहरूलाई भने १५ हजार रुपैयाँसहित सम्मान गरिने भएको छ । फुटबल, क्रिकेट, एथ्लेटिक्स, कराते, तेक्वान्दो, कबड्डी, भलिबल, बक्सिङ, जिम्नास्टिक, उसु, जुडो, आर्चरी, ह्यान्डबल, गल्फ, ब्याडमिन्टन, फेन्सिङ, पौडी, ट्रायथलन, कुस्ती, टेबल टेनिस, हक्की, स्की, क्यानोइङ, साइक्लिङ, तेक्वान्दो र लन टेनिसका खेलाडी सम्मानित हुनेछन् । खेलाडी संघले खेलाडीहरूको हकहित, संरक्षण तथा प्रोत्साहनका लागि यस वर्ष पनि विभिन्न विधामा उत्कृष्ट खेलाडी छनोट गरी सम्मान गर्ने तयारी गरेको जनाएको छ । अवार्ड कार्यक्रममा विभिन्न सांस्कृतिक प्रस्तुति, कलाकारहरूको सहभागिता तथा खेल क्षेत्रका विशिष्ट व्यक्तित्वहरूको उपस्थिति रहने संघका सचिव मन्डेकाजी श्रेष्ठले जानकारी दिए ।
प्रकाशित मिति: १८ चैत्र २०८२, बुधबार
