१८ चैत्र २०८२, बुधबार
काठमाडौँ । नेकपा एमाले संसदीय दलका नेता रामबहादुर थापाले सत्तापक्ष (रास्वपा) सँग संसदीय अंकगणित भएपनि वास्तविक जनमत भने प्रतिपक्षको पक्षमा रहेको दाबी गरेका छन् ।
बुधवार पार्टी कार्यालयमा संसदीय दलको नेता चयन भएपछि सञ्चारकर्मीहरुसँग कुरा गर्दै उनले यस्तो बताएका छन् । थापाकाअनुसार कुल खसेको १ करोड ८ लाख मतमध्ये रास्वपाको पक्षमा ४७ प्रतिशत अर्थात झन्डै ५१ लाख मत मात्र परेको छ । बाँकी ५३ प्रतिशत मत रास्वपाको विरुद्धमा अर्थात प्रतिपक्षमा रहेका दलहरूको पक्षमा रहेको उनको तर्क छ । उनले नेपाली काँग्रेस, एमाले, नेकपा र मधेसवादी दलहरूलाई जनताले प्रतिपक्षको भुमिका दिएको र यो भुमिकालाई दृढतापूर्वक निर्वाह गर्ने बताएका छन् ।
उनले भने, ‘संसदीय अंकगणितले रास्वपा बहुमतमा देखिए पनि जनमतको हिसावले ऊ अल्पमतमा छ र प्रतिपक्ष बहुमतमा छ ।’
निर्वाचनको पूर्ण समीक्षा आगामी केन्द्रिय समितिको बैठकमा गरिने भएपनि प्रारम्भिक रूपमा जनमतको यो अवस्थालाई एमालेले आफ्नो शक्तिको रूपमा बुझेको छ ।
प्रकाशित मिति: १८ चैत्र २०८२, बुधबार
