२१ फाल्गुन २०८२, बिहीबार
बर्लिन । जर्मनीका लागि कार्यबाहक नेपाली राजदूत सागर प्रसाद फुँयालले नेपालको पर्यटन क्षेत्रमा लगानीका लागि आग्रह गरेका छन् । मंगलबार बर्लिनमा आयोजित “नेपाल साँझ”लाई सम्बोधन गर्दै उनलेे नेपालको पर्यटन क्षेत्रमा प्रशस्त सम्भावना रहेको बताँउदै यस्तो आग्रह गरेका हुन् ।
उनले पर्यटन नेपालको प्रमुख आर्थिक कूटनीतिको रुपमा रहेको बताए । नेपाल -जर्मन लामो कुटनैतिक सम्बन्ध भएको मुलुक रहेको भन्दै जनस्तरको सम्बन्ध प्रगाढ बनाउन र लगानीको लागि उपयुक्त वातावरण बनाउन आवश्यक रहेको बताए ।
कार्यवाहक राजदूत फुयाँलले नेपालको प्राकृतिक सुन्दरता तथा संस्कृती पर्यटन विकासको महत्त्वपूर्ण आयाम रहेकोमा जोड दिए । उनले नेपाल दिगो पर्यटन विकासको लक्ष्यका साथ अगाडि बढिरहेको र पर्यटन पुर्वाधारमा लगानी गरिरहेको बताए । साथै नेपालमा वैदेशिक लगानीका अवसरहरू रहेको बताए । साथै नेपाल र जर्मनीबीचको जनस्तरको सम्बन्धलाई जोड्नु आवश्यक रहेकोमा उनको जोड थियोे । उनले नेपाल आकर्षक गन्तव्य रहेकाले नेपाल भ्रमणका लागि आग्रह गरे । “नेपालको पर्यटन क्षेत्रका लागि जर्मनी महत्त्वपूर्ण स्रोतको रुपमा रहेछ । नेपालले दिगो पर्यटन विकासको लक्ष्यका साथ पर्यटन पूर्वाधार विकास गर्दै अगाडि बढिरहेको छ ,”उनलेे भने,” म जर्मनीका व्यावसायि तथा लगानीकर्तालाई निश्चिन्त भएर नेपालमा लगानीका लागि आग्रह गर्दछु ।”
बर्लिनमा जारी पर्यटन मेला ‘आईटीबी बर्लिन २०२६’ को अवसरमा दुतावास र नेपाल पर्यटन बोर्डको संयुक्त आयोजनामा “नेपाल साँझ “आयोजना गरिएको थियोे ।
प्रकाशित मिति: २१ फाल्गुन २०८२, बिहीबार
