११ बैशाख २०८२, बिहीबार
काठमाडौँ। राष्ट्रिय स्वतन्त्र पार्टीले उपसभापति डा. स्वर्णिम वाग्लेको नेतृत्वमा संसद्को बजेट अधिवेशनमा छलफल अगाडी बढाउने निर्णय गरेको छ ।
बिहीवार सिंहदरबारस्थित पार्टीको संसदीय दलको कार्यालयमा बसेको संसदीय दलको बैठकले बजेट अधिवेशन प्रभावकारी बनाउनको लागि उपसभापति वाग्लेको नेतृत्वमा संसद्मा छलफल र बहस गर्ने निर्णय गरेको हो । संसदीय दलको बैठकपछि पार्टीका प्रमुख सचेतक सन्तोष परियारले उपसभापति वाग्लेको नेतृत्वमा बजेट अधिवेशनमा छलफल, बहस र संवाद अगाडी बढाउने निर्णय गरिएको बताएका छन् । उनले बजेट अधिवेशनमा नीति तथा कार्यक्रम, बजेटका प्राथमिकता र सिद्धान्तहरु लगायतका विषयवस्तुमाथि छलफल र बहसमा भाग लिएर देश र नागरिको हितमा संसद्मा भुुमिका निभाउने जिकिर गरेका छन् ।
उनले भने, “यो बजेट अधिवेशन प्रभावकारी बनाउनको लागि बजेट अधिवेशनमा छलफल, बहस, संवाद, नीति तथा कार्यक्रम, बजेटका प्राथमिकता र सिद्धान्तहरुमा छलफल गर्ने क्रममा पार्टीका उपसभापति डा. स्वर्णिम वाग्लेको नेतृत्वमा हामीले संसद्मा छलफल, बहस गर्ने र सबै विषयवस्तुमाथि छलफल र बहसमा भाग लिएर त्यसलाई वृहत्तर देश र जनताको हितमा संसद्मा संसदीय भुमिका निर्वाह गर्ने निर्णय गर्यौं ।”
रास्वपाको गत वैशाख ४ गते बसेको केन्द्रिय समितिको बैठकले शिक्षकहरुको आन्दोलन, उनीहरुका माग र मुद्दाहरुको अध्ययन र संसद्मा प्रस्तुत हुने विद्यालय शिक्षा विधेयकको विषयमा छलफल गर्न निर्देशन दिएको थियो । सोही निर्देशनअनुसार शिक्षाका माग पूरा गराउनको लागि संसद्मा प्रभावकारी भुमिका खेल्न संसद्को शिक्षा, स्वास्थ्य तथा सूचना प्रविधि समितिमा रहेका डा. तोषिमा कार्की र सुमना श्रेष्ठ तथा पूर्वशिक्षामन्त्री शिशिर खनालको टिम बनाउने निर्णय गरिएको प्रमुख सचेतक परियारले बताएका छन् ।
उनले भने, “राष्ट्रिय स्वतन्त्र पार्टी संसदीय दललाई गत वैशाख ४ गतेको केन्द्रिय समितिको बैठकले शिक्षकहरुको आन्दोलन, शिक्षकहरुका माग र मुद्धाहरुलाई अध्ययन गर्ने र विधेयक संसद्मा प्रस्तुत गर्नको लागि शिक्षकहरुको जुन न्यायसंगत विषयवस्तु छ, त्यसलाई कार्यान्वयन गर्नको लागि संसद्मा प्रभावकारी भुमिका खेल्ने विषय थियो । त्यो विषयमा हामीले हाम्रो पार्टीका तर्फबाट संसद्को विषयगत समिति शिक्षा समितिमा रहनुभएका माननीय डा. तोषिमा कार्की, सुमना श्रेष्ठ र पूर्वशिक्षामन्त्री शिशिर खनालको त्यो निर्देशन कार्यान्वयन गर्नको लागि उहाँहरुको एउटा टिम बनाएर शिक्षकहरुको मागको सम्बन्धमा छलफल बढाउँछौं ।”
रास्वपाले निजामति सेवा ऐनका विषयमा छलफल भएको बताएको छ । संसदको बजेट अधिवेशन शुक्रवारदेखि शुरु हुदैँछ ।
प्रकाशित मिति: ११ बैशाख २०८२, बिहीबार
