२१ चैत्र २०८१, बिहीबार
काठमाडौँ। जनमत पार्टीका अध्यक्ष डा. चन्द्रकान्त राउतले प्रतिगामी शक्तिहरुको व्यवस्थाविरोधी गतिविधिहरुमा यथास्थितिवादीहरुले घ्यू थप्ने काम गरेको टिप्पणी गरेका छन् ।
सात मधेसवादी राजनीतिक दलहरुको संघीय लोकतान्त्रिक मोर्चा घोषणा कार्यक्रममा बोल्दै अध्यक्ष राउतले यस्तो टिप्पणी गरेका छन् । मुलुक राजनीतिक रुपमा जटिल अवस्थामा आइपुगेको उनको भनाइ छ । उनले गणतन्त्रविरुद्धमा आवाज उठाउँदा गैरसंवैधानिक हुन्छ कि संविधानले संघीयता परिभाषित गरिसकेको अवस्थामा एकात्मक शासन मान्ने कुरा पनि गैरसंवैधानिक हुन्छ ? भन्दै प्रश्न गरेका छन् । गणतन्त्रको रक्षार्थ उभिने ठुला राजनीतिक नेतृत्वहरुको मुखबाट संघीयताबारे मुख खुल्ने नगरेको उनको आरोप छ । उनले संघीयतामार्फत नेपाली जनताले पाएको अधिकार समेत खोस्ने चेष्टा भइरहेको टिप्पणी गरेका छन् । सांकेतिक रुपमा प्रदान गरिएको संघीयता स्थापनको ९ वर्षसम्म समेत कार्यान्वयन हुन नसकेको उनको तर्क छ ।
उनले भने, ‘देशमा अहिले राजनीतिक रुपमा जटिल माहोल निर्माण भएको छ । अनावश्यक रुपमा प्रतिगामी शक्तिहरुले हलचल मच्चाइराखेको अवस्था छ । त्यसमा यथास्थितिवादीहरुले ध्यू थप्ने काम गर्दैछन् । केही दिन अगाडि प्रधानमन्त्रीज्यूले गणतन्त्रवादी दलहरुको भेला राख्नु भएको थियो । र त्यहाँ विभिन्न दलका अध्यक्षहरु आउनु भएको थियो । मैले उहाँहरुलाई सोधे–गणतन्त्रको विरुद्धमा आवाज उठाउँखेरि मात्र गैरसंवैधानिक हुन्छ कि संविधानले संघीयता परिभाषित गरिसकेको अवस्थामा एकात्मक शासन मान्ने विरुद्धमा पनि गैरसंवैधानिक हुन्छ । तपाईहरु गणतन्त्र रक्षा गर्ने त भन्नुहुन्छ तर संविधान रक्षा गर्ने कुरा तपाईहरुको मुखबाट कहिले सुन्दैन । त्यो किन भएको हो ? त्यसबाट हामीले षड्यनत्र बुझ्नसक्छौं । अहिले हामीले जुन अधिकार पाइसकेका थियौं त्यो अधिकार पनि खोस्ने चेष्टा भइरहेको छ । संघीयता सांकेतिक रुपमा भएपनि प्रदान गरियो अलिकति । तर ९ वर्ष भइसक्दा समेत त्यसको कार्यान्वयन गरिएको छैन ।’
उनले संघीयताको सफल कार्यान्वयन नभएकै कारण प्रहरी र सिडिओले समेत मुख्यमन्त्रीलाई टेर्ने अवस्था नरहेको बताउंदै व्यवस्था र संघीयता कार्यान्वयनको लागि मोर्चा गठन गरिएको र विचार मिल्ने अन्य राजनीतिक दलहरुलाई समेत मोर्चामा आवद्ध हुन आह्वान गरेका छन् ।
प्रकाशित मिति: २१ चैत्र २०८१, बिहीबार
