पूर्वविशिष्टहरुलाई सुरक्षाबाहेक कुनै पनि सुविधा नदिनेगरी कानुन बनाउनुपर्छः महामन्त्री थापा

 काठमाडाैं । नेपाली कांग्रेसका महामन्त्री गगनकुमार थापाले पूर्व विशिष्टहरुलाई सुरक्षाबाहेक कुनै पनि सुविधा नदिनेगरी कानुन बनाउन आवश्यक रहेको बताएका छन् । आज (शनिबार) इलाममा आयोजित पार्टीको कार्यक्रमलाई सम्बोधन गर्दै उनले अदालतको आदेशबमोजिम त्यससम्बन्धि कानुन बनाउन बाँकी रहेको बताए । उनले अब पूर्वविशिष्टहरुको सन्दर्भमा कानुन बनाउँदा सुरक्षाबाहेक अन्य सुविधा केही पनि नदिने सुनिश्चित गर्न आवश्यक रहेको उनको भनाइ थियो ।

‘कानुन बनाउँदै गर्दा सेवा सुविधा दिने कानुन होइन, नदिने कानुन बनाउनुपर्छ । पूर्वराजालाई म सुरक्षा दिन्छु, पूर्वराष्ट्रपतिलाई म सुरक्षा दिन्छु । किनकी सुरक्षा चाहिन्छ, राज्यको जिम्मेवारी हो । तर, सुरक्षाबाहेक म केही पनि दिन्नँ । मैलेमात्र होईन, कुनै पनि प्रधानमन्त्रीलाई लहड चलेर दिन पाइँदैन भन्ने कानुन बनाउनुपर्यो,’– महामन्त्री थापाले भने ।महामन्त्री थापाले पूर्व विशिष्टहरुलाई सुविधा दिने गरी कानुन बनाउने विषय अहिले ल्याएर सरकारले नदुखेको टाउको दुखाएको उनको टिप्पणी छ ।

‘पूर्वविशिष्टहरुलाई आजीवन सुविधा दिने भनेर आयो । यो अहिलेको लागि कतै चाहिने विषय हो त ? कहीँ कतैबाट नदुखेको कपाल डोरी लगाएर दुखाएको जस्तो,’– उनले भने ।सरकारले पूर्व विशिष्टलाई आजीवन सुविधा दिनेगरी विधेयक ल्याउन लागेको भन्दै अहिले चौतर्फी विरोध भइरहेको छ । पूर्वराष्ट्रपति, पूर्वउपराष्ट्रपति, पूर्वप्रधानमन्त्री, मन्त्रिपरिषदका पूर्वअध्यक्ष र राष्ट्रियसभा पूर्वअध्यक्षलाई आजीवन सुविधा दिने व्यवस्था विधेयकमा गरिएको छ ।