१६ चैत्र २०७९, बिहीबार
१६ चैत्र, काठमाडाैँ । धरान उपमहानगरपालिकाका मेयर हर्क साम्पाङले आफु पनि आन्दोलनमा उत्रिने चेतावनी दिएका छन् । सरकारले धरान खानेपानी आयोजनाको ऋण मिनाहा नगरे आन्दोलनमा उत्रिने चेतावनी साम्पाङले दिएका हुन् ।
उनले ऋण मिनाहाका लागि पटक-पटक सम्बन्धित मन्त्रालयलाई अनुरोध गरे पनि सुनुवाइ नभएको बताएका छन् ।
धरानमा सरकारले एसियाली विकास बैंक (एडिबी) को अनुदान तथा ऋण सहयोगमा खानेपानी आयोजना सम्झौता गरेको थियो । उक्त ऋण १ प्रतिशतमा लिएर ५ प्रतिशतमा सरकारले धरानलाई दिएको उनले उल्लेख गरेका छन् ।
आन्दोलनको चेतावनी दिँदै उनले फेसबुकमा लेखेमा छन्, ‘मिटर ब्याजको कुरा भइरहँदा धरानमा एडिबीको ऋणमासमेत नेपाल सरकार आफैंले त्यसो गरेको छ । १% मा लिएर ५% मा हामीलाई दिएको छ । यो ऋण मिनाहा गरिदिन सम्बन्धित मन्त्रालयलाई मैले अनुरोध पनि गरेँ तर सुनुवाइ भएन । ध्यान जावोस् यता पनि नत्र म पनि आन्दोलनमा कुद्नु पर्ने दिन आउनेछ।’
प्रकाशित मिति: १६ चैत्र २०७९, बिहीबार
