२६ मंसिर २०८१, बुधबार
काठमाडौँ । इरानको यु–१८ टिमले काभा मेन्स भलिबल क्लव च्याम्पियनसिपमा लगातार तेस्रो जित हात पार्दै काभा मेन्स भलिबल क्लव च्याम्पियनसिपको सेमिफाइनलमा प्रवेश गरेका छन् ।
भारतको क्यालीकटलाई सोझो सेटमा पराजित गर्दै इरानको युवा टिम एक खेल अगाडि नै सेमिफाइनलमा पुगेका हुन् । राष्ट्रिय खेलकुद परिषद्को कभर्ड हलमा आज भएको क्यालीकट र इरानको टिमबीचको खेल प्रतिष्पर्धात्मक हुने अनुमान गरिएको थियो । तर इरानको युवा खेलाडीहरूको प्रदर्शन उत्कृष्ट रह्यो ।
पहिलो सेट प्रतिष्पर्धात्मक बनेपनि २७/२५ ले इरानले जिते । एक सेट गुमाएपछि दोस्रो सेटमा पनि क्यालीकट खेलमा फर्कन सकेन । सहजै इरानको यु–१८ टिमले २५/२२ ले जिते । खेलमा दुई शुन्यको स्पष्ट अग्रता कायम गरे । २५/२० ले तेस्रो सेट पनि सहजै इरानले जिते । यो सोझो सेटको जितमा इरानले लगातार तेस्रो जित सहित ७ अंक बनाएका छन् । इरानले यसअघि पहिलो खेलमा माल्दिभ्सको क्लव एचडिसीलाई र दोस्रो खेलमा नेपालको गण्डकी प्रदेश भलिबल संघलाई ३–२ को सेटमा हराएका थिए ।
पराजित क्यालिकटको भने यो दोस्रो हार हो । क्यालीकट पहिलो खेलमा टिमटप हेल्प नेपालसँग हारेका थिए । दोस्रो खेलमा माल्दिभ्सको क्लव एचडिसीलाई हराएपनि आज इरानसँग सोझो सेटमा पराजित भए । उसले तीन खेलबाट मात्र ४ अंक बनाएका छन् ।
प्रकाशित मिति: २६ मंसिर २०८१, बुधबार
