२८ फाल्गुन २०८०, सोमबार
काठमाडाैं । राष्ट्रिय प्रजातन्त्र पार्टीको कार्यसम्पादन समितिको बैठक चलिरहेका बेला एक नेता कुटिएका छन् । राप्रपा नेता ठाकुरमोहन श्रेष्ठमाथि राप्रपा केन्द्रीय कार्यालयमा कुटपिट भएको हो । कार्यसम्पादन समितिको बैठकमा नेताहरूले धारणा राख्नेक्रममा नेता श्रेष्ठले उपाध्यक्ष विक्रम पाण्डेलाई भ्रष्टाचारी भनेपछि विवाद भएको नेताहरूले बताएका छन् ।
भ्रष्टाचारी भनेपछि विवाद बढेको र ब्रेकपछि बैठक बस्न लाग्दा पाण्डेसमर्थकले श्रेष्ठमाथि कुटपिट गरेको दाबी छ । श्रेष्ठलाई भिडले लखेटी लखेटी कुटपिट गरेको भिडियोसमेत सार्वजनिक भएको छ । कुटपिटमा परेका श्रेष्ठ एपीएफका पूर्व एआईजीसमेत हुन् ।
कुटपिट भएको प्रकरणमा प्रहरीले छानबिन थालेको छ । पार्टी कार्यालयभित्रै सांघातिक आक्रमणमा परेका पूर्वएआईजी समेत रहेका श्रेष्ठले पार्टी महामन्त्री पाण्डेको योजनामा आफूमाथि आक्रमण गरिएको भन्दै पाँच जनाविरुद्ध प्रहरी वृत महाराजगञ्जमा उजुरी दिएका हुन् ।
जिल्ला प्रहरी परिसर काठमाडौँका एसएसपी भूपेन्द्र खत्रीले घटनाबारे अनुसन्धान गर्न सिसिटिभी फुटेज संकलन गरिएको बताए । जिल्ला प्रहरी काठमाडौंका प्रवक्ता एसपी नवराज अधिकारीले प्रहरी वृत्त, महाराजगञ्जमा श्रेष्ठले ठाडो निवेदन दिएको बताए । ‘निवेदन आएपछि कुटपिट भएको विषयमा प्रहरीले अनुसन्धान थालेको छ’, उनले भने ।
प्रकाशित मिति: २८ फाल्गुन २०८०, सोमबार
