१८ फाल्गुन २०८०, शुक्रबार
काठमाडौं। पश्चिमी बायुको प्रभावका कारण आगामी आइतबारसम्म काठमाडौं उपत्यकासहित मध्यपहाडी क्षेत्रमा चट्याङसहितको असिना पानी पर्ने सम्भावना रहेको छ ।
त्यस्तै, मौसमविद् डा. विनोद पोख्रेलले शनिबार र आइतबार मध्यपहाडी क्षेत्र र काठमाडौं उपत्यकामा समेत चट्याङ र असिनासहितको पानी पर्ने सम्भावना रहेको बताएका छन् ।
‘शनिबार विहानैदेखि वर्षा हुने र पश्चिमी क्षेत्रमा हिमपात र हल्का वर्षा हुने देखिन्छ । पोखरा र काठमाडौंमा पनि वर्षा हुने देखिन्छ,’ उनले भने । आइतबार पनि पानी पर्न सक्ने र सोमबारदेखि फेरि मौसम सामान्य हुने उनले बताए । उनका अनुसार यही अवधिमा तराईमा भने हल्का वर्षामात्रै हुने छ।
पूर्वी तराईमा भने पानी पर्ने सम्भावना कम छ भने उच्च पहाडी र हिमाली भेगमा भने हिमपात हुने मौसमविद् पोख्रेलले जानकारी दिएका छन् । सुदूरपश्चिम र कर्णाली प्रदेशका थोरै स्थानहरूमा आज हल्का वर्षाको सम्भावना रहेको मौसम पूर्वानुमान महाशाखाले जनाएको छ।
प्रकाशित मिति: १८ फाल्गुन २०८०, शुक्रबार
