९ फाल्गुन २०८०, बुधबार
काठमाडौं । भारतमा नेपाली नागरिकले नेपाली कागजातका आधारमा सिमकार्ड खरिद गर्न पाउने भएका छन्। १२ वर्षपछि भारतले नियम सच्याएर नेपाली र भुटानी नागरिकका लागि सिमकार्ड लिन सजिलो व्यवस्था गरेको छ। नेपाली नागरिकता, राहदानी वा निर्वाचन परिचयपत्रका आधारमा नेपाली नागरिकलाई सिमकार्ड उपलब्ध हुने भारतको सूचना मन्त्रालयअन्तर्गतको सूचना विभागले जनाएको छ।
विभागले भारतमा लाइसेन्स प्राप्त सबै मोबाइल कम्पनीका नाममा परिपत्र जारी गरी नेपाली र भुटानी नागरिकलाई सिमकार्ड बिक्री गर्न आग्रह गरेको छ। नेपाली नागरिकले अब सिमकार्ड प्राप्त गर्ने सुनिश्चितता कार्यान्वयन गर्न एक साताजति समय लाग्नेछ। ’
नेपाल र भुटान का नागरिकलाई भारत जाँदा भिसा लिनुपर्दैन। भिसा नलिएको राहदानीका आधारमा भारतीय दूरसञ्चार कम्पनीहरूले सिमकार्ड दिन बन्द गरेका थिए। जसको सामना उपचारदेखि अध्ययन र तीर्थाटन गर्न आउने नेपालीहरूले भोग्दै आएका थिए।
अब नेपाली नागरिकले भारतमा सिमकार्ड लिन पाउनेछन्।
प्रकाशित मिति: ९ फाल्गुन २०८०, बुधबार
