देशभरकाे मौसममा बदली, कहाँ कहाँ वर्षाको सम्भावना?

काठमाडाै । पश्चिमी वायुसँगै भारतको विहार राज्य क्षेत्रमा बनेको न्यून चापीय प्रणालीका कारण बुधबार मध्याह्न पनि देशका धेरैजसो क्षेत्रमा बदली (बादल लागेको) छ । जसकारण अघिल्ला दिनका तुलनामा जाडो पनि बढेको छ । तर, सुदूरपश्चिम प्रदेशमा भने आंशिक बदली मात्र छ । मंगलबार काठमाडौंको अधिकतम तापक्रम २२.७ डिग्री सेल्सियस पुगेको थियो । तर, बुधबार भने बादलका कारण अधिकतम तापक्रम १९ देखि २१ डिग्रीमा झर्ने आकलन गरिएको छ ।

मौसम पूर्वानुमान महाशाखाका अनुसार यो प्रणालीको बढी असर पूर्वी भेगमा छ । बिहारमा क्षेत्रमा बनेको न्यून चापीय प्रणालीका कारण अहिले मधेस र कोशीका तराई क्षेत्रमा बाक्लो बादल छ । त्यसक्षेत्रमा दिउँसो र राति वर्षा हुनसक्ने आकलन गरिएको छ । त्यसबाहेक सुदूरपश्चिमबाहेक बाँकी ५ प्रदेशका केही ठाउँमा पानी पर्नसक्ने ठानिएको छ । त्यसैगरी, उच्च पहाडी तथा हिमाली क्षेत्रमा हल्का हिमपातको सम्भावना छ ।काठमाडौं उपत्यकामा मंगलबार अपराह्नपछि बदली भएको थियो । बुधबार बिहानदेखि घाम लाग्न सकेको छैन ।