१९ माघ २०८०, शुक्रबार
काठमाडौं। गत कात्तिक १७ गते गएको भूकम्पबाट पीडित भएकाहरूका लागि निर्माण गरिएका अस्थायी आवास पालिकामार्फत हस्तान्तरण गरिएको छ । भूकम्पको केन्द्रबिन्दु रहेको बारेकोट-१ रामीडाँडाका पीडितका लागि निर्माण गरिएका अस्थायी आवास एक कार्यक्रमबीच गाउँपालिकामार्फत सम्बन्धित प्रभावितलाई हस्तान्तरण गरिएको हो ।
त्यस्तै, कर्णाली एकीकृत ग्रामीण विकास तथा अनुसन्धान केन्द्र (किर्डाक नेपाल) ले दुई सय दश अस्थायी आवासको काम सकेपछि पालिकामा अस्थायी आवास हस्तान्तरणको कार्यक्रम आयोजना गरी भूकम्प पीडितलाई बस्न लगाइएको हो भने किर्डाक नेपालले आवास, प्राविधिक सहयोग र भूकम्प प्रभावितलाई प्रदान गरिएको न्यानो कपडा गरेर दुई करोड बजेट खर्च गरेको छ ।
किर्डाकसँगै एचआई र पिनको संयुक्त लगानीमा बारेकोट गाउँपालिका–१ रामीडाँडाका विभिन्न बस्तीसँगै वडा ५ को तोलखान बस्तीमा अस्थायी आवासको काम गरेको थियो ।
त्यस्तै, वडाअन्तर्गत बयालाका ४२, सिनाकोटका २९ वटा, दलित आगरका ५५, माथि आगरका ४२ र वडा ५ तोलखानका ३२ घर गरेर दुई सय दश अस्थायी आवास निर्माणको काम सकेर पालिकामार्फत पीडितलाई बुझाइएको किर्डाक नेपालले जनाएको छ ।
प्रकाशित मिति: १९ माघ २०८०, शुक्रबार
