९ पुष २०८०, सोमबार
काठमाडाैं। नेपालका तीन अन्तर्राष्ट्रिय विमानस्थलमध्ये त्रिभुवन विमानस्थलपछि पोखराबाट बढी अन्तर्राष्ट्रिय व्यापार भएको देखिएको छ । पोखरा अन्तर्राष्ट्रिय विमानस्थलबाट चालु आर्थिक वर्षको पहिलो ५ महिनामा २७ करोड ७४ लाख रुपैयाँ बराबरको वस्तु आयात भएको छ ।
त्यसैगरी, उडानमार्फत व्यवसायीले सो मूल्य बराबरको सामान भित्राएको भन्सार विभागको तथ्याङ्कमा देखिएको छ, यो विमानस्थल हुँदै निर्यात भने भएको छैन । पोखरामा नियमित अन्तर्राष्ट्रिय उडान छैन,तर त्यहाँ पर्यटन प्रयोजनका लागि बेला बेला चार्टर्ड उडानहरू भइरहेका छन् ।
त्यस्तै, भैरहवास्थित गौतमबुद्ध अन्तर्राष्ट्रिय विमानस्थलबाट भने मात्र ८ लाख ४२ हजार रुपैयाँ बराबरको वस्तु यस अवधिमा आयात भएको छ भने नियमित उडान निरन्तर प्रभावित हुँदा गौतमबद्धबाट अपेक्षित वैदेशिक व्यापार हुन नसकेको हो ।
त्रिभुवन अन्तर्राष्ट्रिय विमानस्थलबाट भने अर्बौँ रुपैयाँ बराबरको अन्तर्राष्ट्रिय व्यापार हुन्छ । तथ्याङ्क अनुसार मंसिरसम्म यो विमानस्थलबाट ५७ अर्ब ४८ करोड रुपैयाँ बराबरको वस्तु आयात भएको छ भने यो कुल आयातको ८.९५ प्रतिशत हो ।
यस वर्ष ५ महिनामा ६ खर्ब ४२ अर्ब रुपैयाँको आयात भएको छ भने यस विमानस्थलबाट ५ महिनामा १५ अर्ब ७० करोड रुपैयाँको वस्तु निर्यात भएको छ । यो कुल निर्यातको २४.८४ प्रतिशत हो । समीक्षा अवधिमा ६३ अर्ब २० करोड रुपैयाँको वस्तु निर्यात भएको छ ।
प्रकाशित मिति: ९ पुष २०८०, सोमबार
