१५ मंसिर २०८०, शुक्रबार
काठमाडौँ । राष्ट्रपति रामचन्द्र पौडेलले चुरे संरक्षणका लागि स्थायी समाधान खोज्न र त्यसका लागि आवश्यक काम गर्न राष्ट्रपति चुरे – तराई मधेश संरक्षण विकास समितिलाई निर्देशन दिनुभएको छ ।
उहाँले राष्ट्रपति चुरे – तराई मधेश संरक्षण विकास समितिका पदाधिकारीसँग शुक्रबार राष्ट्रपति भवन शीतलनिवासमा चुरे संरक्षणका सम्बन्धमा भएको छलफलमा त्यस्तो बताउनुभएको हो । उहाँले चुरे विनासले निम्त्याउने संकटप्रति चिन्ता व्यक्त गर्दै अहिलेको काम गराईले मात्र दीर्घकालीन समाधान नहुने धारणा राख्दै राज्यको तदारुकतामा स्थायी समाधान खोज्नुपर्ने बताउनुभएको राष्ट्रपतिका प्रेस सल्लाहकार किरण पोखरेलले जानकारी दिनुभयो ।
राष्ट्रपति पौडेलले पहिरो रोक्नुपर्ने, खोलानदीले बगाएर ल्याउने ढुंगा, गिटी, गेग्रयान हटाएर खोला बग्ने निश्चित धार बनाउने, हटाएको ढुंगा, गिटी, बालुवा राष्ट्रिय आवश्यकताका लागि प्रयोग गर्ने, हरियाली निर्माण गर्ने, वस्ती सुधार गर्ने जस्ता विभिन्न कामका लागि राज्यले नै वृहत योजना बनाएर तदारुकताका साथ काम गर्नुपर्नेमा जोड दिनुभएको थियो । छलफलमा विकास समितिका पदाधिकारीहरुले समितिले हाल गरिरहेको कामबारे जानकरी गराएका थिए ।
प्रकाशित मिति: १५ मंसिर २०८०, शुक्रबार
