२३ फाल्गुन २०७९, मंगलवार
२३ फागुन, काठमाडाैँ । प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्ड विरूद्ध सर्वोच्च अदालतमा रिट दर्ता भएको छ । मंगलबार सर्वोच्च अदालतमा रामेछापका ज्ञानेन्द्रराज आरण, कल्याण बुढाथोकी लगायत २४ द्वन्द्व पीडितहरूको रिट दर्ता भएको हो ।
उक्त रिटको पेसी बिहीबारका लागि तोकिएको जनाइएको छ । सोही रिट गत कात्तिक २४ गते दरपीठ(खारेज) भएता पनि सर्वोच्चका न्यायाधीशद्वय ईश्वरीप्रसाद खतिवडा र हरिप्रसाद फुयालको १९ फागुनको आदेशपछि मंगलबार दर्ता भएको हो ।
रिट निवेदकहरूले प्रचण्डले आफ्ना परिवारका सदस्य मारेको भन्ने अभिव्यक्ति दिएका कारण उनलाई पक्राउ गरी आवश्यक कारबाहीको प्रक्रिया अघि बढाउन माग गरेका छन् ।
गत २०७६ साल माघ १ गते काठमाडाैँमा भएको एक सार्वजनिक कार्यक्रममा जनयुद्धमा मारिएका १७ हजारमध्ये ५ हजार हत्याको जिम्मेवारी आफूले लिने अभिव्यक्ति दिएका थिए ।
रामेछापका ज्ञानेन्द्रराज आरण, जितेन्द्रकुमार मोक्तान, शंखरलाल लामा, सिन्धुपाल्चोकका दीपक हमाल, गोरखाकी होमकुमारी बजगाई, स्वस्तिका अधिकारी, निलम देवकोटा, सीतादेवी ढकाल, जनककुमारी कोइराला, विजय श्रेष्ठ, नवराज पोखरेल, स्याङ्जाकी सावित्री शर्मा, काभ्रेकी पूर्णिमाया लामा, सलामसिंह लामा र ओखलढुंगाकी लक्ष्मी श्रेष्ठले प्रचण्डलाई प्रतिवादी बनाएर रिट दिएका छन् ।
प्रकाशित मिति: २३ फाल्गुन २०७९, मंगलवार
