२२ फाल्गुन २०७९, सोमबार
२२ फागुन, काठमाडाैँ। नेपालले घरेलु टोली युएईमाथि सानदार जित निकालेको छ । सोमबार दुबइ इन्टरनेशनल स्टेडियममा भएको आईसीसी विश्वकप लिग-२ क्रिकेटको त्रीदेशीय श्रृंखलामा नेपालले ४३ रनको जित दर्ता गरेको हो ।
नेपालको जितमा दीपेन्द्र सिंह ऐरीले उत्कृष्ट बलिङ गरे । उनले युएईको तीन विकेट लिएसँगै नेपालले सानदार जित दर्ता गरेको हो ।
नेपालको जितमा ऐरीसहित सन्दीप लामिछानेले २, सोमपाल कामीले २ तथा आरिफ शेख र रोहित पाैडेलले १-१ विकेट लिए ।
टस जितेर पहिले ब्याटिङ गरेको नेपालले युएईसामु जितका लागि २३० रनको लक्ष्य प्रस्तुत गरेको थियो । जवाफी ब्याटिङमा उत्रिएको युएईले ४५ ओभरमा सबै विकेट गुमाउँदै १८७ रन मात्रै जोड्न सक्यो ।
युएईका लागि सबैभन्दा धेरै रन आसिफ खानले बनाए । उनले ११५ बलमा ८२ रन बनाउँदा अर्का ब्याटर आर्यन लक्राले ७८ बलमा ५० रन बनाए ।
त्यसैगरी, नेपालका लागि भने सबैभन्दा बढी रन भीम सार्कीले बनाएका थिए । उनले ९९ बलको सामना गर्दा ७ चाैका प्रहार गर्दै ७० रन जोडेका थिए ।
प्रकाशित मिति: २२ फाल्गुन २०७९, सोमबार
