८ आश्विन २०८०, सोमबार
८ असोज, काठमाडौं । चाडपर्व लक्षित बजार अनुगमनलाई वाणिज्य विभागले तीब्र पारेको छ ।
२ असोजदेखि सुरु भएको संयुक्त अनुगमनमा दैनिक १३ टोली परिचालन भएको विभागले जनाएको छ । विभागले बजार अनुगमनका लागि कुल मिलाएर १३ टोलीको कार्य विभाजन गरेको छ । जसमा १० टोली दैनिक बजार अनुगमनमा खटिने छन् भने २ टोलीले सूचना संकलन र विभागका आउने उजुरीको प्रशोधनमा काम गर्नेछन् । यस्तै एक टोली बजारमा देखिएको कैफियतको परीक्षण र प्रमाणीकरणमा काम गर्ने गरी खटाइएको छ । विभागका सूचना अधिकारी आनन्द पोख्रेलकाअनुसार बजारमा दैनिक करिब ४० वटा फर्म तथा पसलहरुको अनुगमन भइरहेको छ ।
आइतबार कुल ३९ फर्ममा अनुगमन गरिएकामा १३ फर्मलाई नगद जरिवाना तिराइएको विभागले जनाएको छ । शनिबार ४४ वटा फर्ममा अनुगमन भएको थियो । विभागले ठूला चाडपर्व लक्षित अनुगमनका लागि स्थानीय तह र जिल्ला प्रशासन कार्यालयहरुलाई पनि निर्देशन दिइसकेको छ । उपभोक्ता संरक्षण ऐनले हरेक जिल्लाको साहयक प्रमुख जिल्ला अधिकारीलाई बजार अनुगमन अधिकृत तोकेको छ ।
यस्तै स्थानीय तहमा उपप्रमुखको संयोजकत्वमा बजार अनुगमन गर्ने अधिकार कानुनले दिएको छ ।
प्रकाशित मिति: ८ आश्विन २०८०, सोमबार
