९ फाल्गुन २०७९, मंगलवार
काठमाडौ : नेपाल ट्रेड युनियन कांग्रेसका उपाध्यक्ष अजयकुमार राई भारत प्रस्थान गरेका छन् । उपाध्यक्ष राई भारतीय कांग्रेस आई पार्टीसम्बद्ध ट्रेड युनियन महासंघ इण्डियन नेशनल ट्रेड युनियन कांग्रेस (ईन्टक) को फेब्रुअरी २२ र २३ मा नयाँ दिल्लीमा हुने ३३ औँ राष्ट्रिय महाधिवेशनमा सहभागी हुन मंगलबार त्यसतर्फ प्रस्थान गरेका हुन् ।
उनी महाधिवेशनको उद्घाटन सत्रमा अतिथिकोरुपमा सहभागी हुनेछन् ।
७६ वर्ष अगाडि सन् १९४७ मा स्थापित भारतको सबैभन्दा ठुलो सो ट्रेड युनियन महासंघमा करिब ३ करोड ३९ लाख सदस्य छन् । सो संस्थाको ईन्टरनेशनल ट्रेड युनियन कन्फेडेरसनसँग पनि आबद्धता रहि आएको छ । ईन्टकमा २७ वटा फरक–फरक कार्य प्रकृतिका पेशागत संघ स्तरका ट्रेड युनियनहरु आबद्ध छन् । महाधिवेशनमा भारतभरबाट करिब पाँच हजार प्रतिनिधिहरु सहभागी हुनेछन् ।
महाधिवेशनको उद्घाटन कांग्रेस आइका सभापति मल्लिकार्जुन खरगेले गर्ने कार्यतालिका छ । उपाध्यक्ष राई अन्तर्रार्ष्ट्रियस्तरको ट्रेड युनियन इन्टरनेशनल ट्रान्सपोर्ट वर्कस फेडेरेसन बेलायतका विश्व कार्यसमिति सदस्य समेत हुन् ।
प्रकाशित मिति: ९ फाल्गुन २०७९, मंगलवार
